ពីចំណតទៅជាកន្លែងសម្រាប់មនុស្ស

ជាធម្មតា យានដ្ឋានចំណតរថយន្តមិនមែនជាការច្នៃប្រឌិតថ្មីផ្នែកស្ថាបត្យកម្មទេ - យានដ្ឋានទាំងនោះបម្រើគោលបំណងបំពេញមុខងារនៅក្នុងសង្គម ដែលសម្រាប់មនុស្សជាច្រើននៅតែអាស្រ័យលើរថយន្តដើម្បីទៅកាន់គោលដៅរបស់ពួកគាត់ដដែល។ ប៉ុន្តែនៅពេលយើងសម្លឹងទៅកាន់អនាគតដែលអាចមានរថយន្តកាន់តែតិច និងមធ្យោបាយដឹកជញ្ជូនដែលកាន់តែមានចីរភាព ដែលនឹងជួយកាត់បន្ថយការបំភាយកាបូន និងការកកស្ទះចរាចរណ៍ ដែលតម្រូវការសម្រាប់ចំណតរថយន្តទំនងជានឹងថយចុះ។ ដូច្នេះហើយ យានដ្ឋានចំណតរថយន្តដែលប្រើតែមួយដងអាចនឹងមិនពាក់ព័ន្ធ និងត្រូវបានកម្ទេចចោល ដែលបណ្ដាលឱ្យមានការកើនឡើងនូវកាកសំណល់ កាបូន និងការចំណាយ។ នោះហើយជាមូលហេតុដែល Alta Garage ថ្មីរបស់ Google នៅ Mountain View ត្រូវបានរចនាឡើងក្នុងគោលបំណងមិនមែនជាយានដ្ឋានចំណតនៅថ្ងៃណាមួយ – ហើយត្រៀមខ្លួនរួចរាល់ដើម្បីបំប្លែងទៅជាការប្រើប្រាស់ខាងពាណិជ្ជកម្ម លំនៅឋាន ឬសហគមន៍នៅពេលណាដែលសមស្រប។

គំនិតនេះត្រូវបានហៅថាកន្លែងចតរថយន្តដោយគិតគូរអំពីពេលអនាគត៖ នៅពេលតម្រូវការសង្គមផ្លាស់ប្ដូរនៅពេលអនាគត Alta Garage ក៏អាចបំពេញតម្រូវការនោះបានដែរ។ ត្រូវការការិយាល័យ លំនៅឋាន បរិក្ខារ ឬកន្លែងរៀបចំព្រឹត្តិការណ៍បន្ថែមមែនទេ? Alta Garage អាចផ្លាស់ប្ដូរទៅកន្លែងណាមួយក្នុងចំណោមកន្លែងខាងលើនេះ នៅពេលដែលតម្រូវការចំណតមានការថយចុះ។ ហើយ​ការធ្វើបែបនេះក៏​ធ្វើទៅបាន​ក្នុង​របៀប​ដែល​កាត់បន្ថយ​ការចំណាយ សន្សំ​សំចៃពេលវេលា កាត់បន្ថយ​ការខ្ជះខ្ជាយ និង​បង្កើន​ចីរភាពផងដែរ។

យើងបានប្ដេជ្ញាចិត្តជាយូរមកហើយក្នុងការវិនិយោគលើដំណោះស្រាយដឹកជញ្ជូនប្រកបដោយចីរភាព រួមទាំងកម្មវិធីធ្វើ​ដំណើរ​រួម​គ្នា យានជំនិះដែលបើកបរ​ដោយស្វ័យប្រវត្តិ និងបច្ចេកវិទ្យា ដែលជួយមនុស្សធ្វើការសម្រេចចិត្តដែលកាន់តែអំណោយផលដល់បរិស្ថាន។ Alta Garage ប្រើប្រាស់គោលដៅទាំងនេះក្នុងការរចនាដែលគិតគូរអំពីពេលអនាគតរបស់ខ្លួន ដែលក៏គាំទ្រដល់ចក្ខុវិស័យរបស់ទីក្រុង Mountain View ដើម្បីឱ្យតំបន់នេះក្លាយជាតំបន់ដែលប្រើប្រាស់រថយន្តកាន់តែតិចដែលជំរុញជម្រើសធ្វើដំណើរជាប្រចាំប្រកបដោយចីរភាព។

ប៉ុន្តែតើអ្នករចនាយានដ្ឋានយ៉ាងណាទើបធ្វើឱ្យយានដ្ឋាននេះអាចប្រើបាននាពេលបច្ចុប្បន្ន ហើយក៏អាចសម្របទៅតាមការប្រើប្រាស់ផ្សេងៗជាច្រើនដែលអាចមាននាពេលអនាគត? នៅឆ្នាំ 2018 ក្រុមការងារមន្ទីរពិសោធន៍ផ្នែកស្រាវជ្រាវ និងអភិវឌ្ឍន៍ខាងអចលនទ្រព្យរបស់ google បានចាប់ផ្ដើមត្រិះរិះសំណួរនេះឡើងវិញ។ គោលដៅនេះត្រូវបានជំរុញដោយបំណងប្រាថ្នារបស់ស្ថាបនិក Google ដើម្បីផ្លាស់ប្ដូរពីគម្រោងដែលមានរថយន្តតៃកុងតែម្នាក់មកផ្ដោតលើមធ្យោបាយដឹកជញ្ជូនដែលបញ្ចេញកាបូនកាន់តែតិច ដូចជាឡានក្រុង កង់ និងយានជំនិះ​ដែលបើកបរ​ដោយស្វ័យប្រវត្តិ (AV) ជាដើម។

Michelle Kaufmann ដែលជានាយក R+D Lab for the Built Environment របស់ Google មានប្រសាសន៍ថា "យើងចង់សាងសង់អ្វីដែលអាចប្រើប្រាស់បាននាពេលអនាគត"។ “យើងបានស្រាវជ្រាវពីបច្ចេកទេសសំណង់ សម្ភារៈ ទំហំ និងយុទ្ធសាស្ត្រផ្សេងៗនៅក្នុងមន្ទីរពិសោធន៍ ដើម្បីកំណត់រកតម្រូវការជាមុន ដើម្បីផ្ដល់នូវរចនាសម្ព័ន្ធដែលអាចបត់បែនបាន ព្រមទាំងកាត់បន្ថយការចំណាយឱ្យនៅកម្រិតអប្បបរមាផងដែរ”។

ចំណុចសំខាន់នោះគឺត្រូវសាងសង់មូលដ្ឋានអគារផ្នែកស្នូល និងផ្នែកសំបកដែលអាចបត់បែន និងសម្របតាមស្ថានភាពបាន ដូច្នេះយានដ្ឋានអាចប្រើជាថ្មីសម្រាប់អ្វីផ្សេងនៅថ្ងៃណាមួយ ប្រសិនបើចាំបាច់។ នៅក្នុងគ្រោងរចនាសម្ព័ន្ធបច្ចុប្បន្នរបស់វា យានដ្ឋាននេះអាចផ្ទុករថយន្តបានជាង 1,700 គ្រឿង ក៏ដូចជាស្ថានីយសាករថយន្តអគ្គិសនីជាង 450 កន្លែង និងផ្ដល់កន្លែងចតរថយន្តសម្រាប់ទាំងបុគ្គលិក Google និងភ្ញៀវរបស់ Google Visitor Experience។ ប៉ុន្តែតាមរយៈការបង្វែរផ្លូវជម្រាលចំណតរថយន្តទៅជាផ្ទៃរាបថ្នាក់ៗ និងជណ្ដើរខាងក្នុង ជាន់នីមួយៗអាចក្លាយជាកន្លែងសម្រាប់ដាក់បរិក្ខារ ការិយាល័យ ឬលំនៅឋាន។ ដើម្បីឱ្យមានភាពងាយស្រួលក្នុងការបំប្លែង យើងថែមទាំងបានសិក្សាអំពីពន្លឺថ្ងៃទៅលើស្ថានភាពពេលអនាគត ដើម្បីធានាថាកម្ពស់ជាន់ និងការដកផ្ទៃជម្រាលចេញនឹងនាំឱ្យមានពន្លឺថ្ងៃអតិបរមា។ ដើម្បីជួយសម្រួលដល់បដិវត្តកម្មនេះ យើងបានសហការយ៉ាងជិតស្និទ្ធជាមួយ Clark Pacific, Gensler, Hollins, International Parking Design, Ellis Partners, SPMD Design និងដៃគូផ្សេងទៀតដើម្បីរួមបញ្ចូលធាតុផ្សំរចនាជាច្រើនដែលធ្វើឱ្យវាខុសពីយានដ្ឋានចំណតស្តង់ដា។

លោក Jeffrey Curry ដែលជានាយកផ្នែកសំណង់នៅ Google មានប្រសាសន៍ថា "ដើម្បីលើកជាឧទាហរណ៍មួយ យានដ្ឋានមានផ្ទៃជាន់ធំខ្លាំង និងពិដានខ្ពស់ខ្លាំង ដែលមានលក្ខណៈកាន់តែស៊ីគ្នានឹងទំហំការិយាល័យ ឬកន្លែងលក់រាយ"។ “ផ្លូវជម្រាលដែលរថយន្តប្រើដើម្បីឆ្លងកាត់ជាន់ផ្សេងៗអាចផ្ដាច់ចេញបាន ​និងអាចរុះរើចេញដើម្បីទុកផ្លូវសម្រាប់របៀង​ផ្លូវ​ក្នុង​អគារ ទីធ្លា ឬផ្ទៃរាបថ្នាក់ៗដែលនឹងអាចឱ្យពន្លឺថ្ងៃចាំងចូលទៅក្នុងទីធ្លាខាងក្នុងនាពេលអនាគត។

លើសពីនេះ ការប្រើប្រាស់ផ្ទៃរាបស្មើដែលមានប្រព័ន្ធបង្ហូរទឹកបានលុបបំបាត់នូវជម្រាលនៅលើផ្ទៃជាន់ ដែលនឹងជួយសម្រួលដល់ការបំប្លែងយានដ្ឋាននៅពេលក្រោយណាមួយ។ បេតុងដែលចាក់ពុម្ពជាស្រេច​ត្រូវបានពង្រឹង ដើម្បីទប់ទល់នឹងបន្ទុករចនាសម្ព័ន្ធខ្ពស់ជាងនេះ ស្របតាមអ្វីដែលមានលក្ខណៈធម្មតាសម្រាប់អគារពាណិជ្ជកម្ម ឬអគារលំនៅឋាន។ ការធ្វើបែបនេះក៏អាចឱ្យមានការដំឡើងជញ្ជាំងវាំងននផងដែរ ដូច្នេះអគារដែលបានបំប្លែងអាចត្រូវបានបែងចែកទៅជាផ្នែកតូចផ្សេងៗ។ ហើយចន្លោះបម្រុងនៃរចនាសម្ព័ន្ធនឹងបង្កលក្ខណៈកាន់តែងាយស្រួលក្នុងការរត់បណ្ដាញទឹក និងបណ្ដាញអគ្គិសនីនាពេលអនាគត។

គំនិតនេះគឺដើម្បីបង្កើតភាពបត់បែនគ្រប់គ្រាន់ដែល Alta Garage អាចជាយានដ្ឋានផង ការិយាល័យផងនាពេលអនាគត ឬបំប្លែងទាំងស្រុងទៅជាការប្រើប្រាស់ផ្សេង។ សម្រាប់ស្ថាបត្យករ ការគិតគូរអំពីពេលអនាគតសំដៅជាមូលដ្ឋានដល់ការធ្វើវិស្វកម្មបញ្ច្រាសយានដ្ឋាន នៅពេលពួកគេរចនាវា។ តើ​ជណ្ដើរជើង និង​ប្រអប់ជណ្ដើរយន្ត​នឹង​មាន​ទីតាំង​នៅ​កន្លែង​ណា​ក្នុង​ការិយាល័យ​នាពេលអនាគត? តើអ្នកអាចបង្កើតកន្លែងសម្រាប់ប្រព័ន្ធទឹក និងប្រព័ន្ធម៉ាស៊ីនត្រជាក់ និងកម្ដៅ ដែលអគារអាផាតមិនចាំបាច់ត្រូវប្រើនៅឯណា? លោក Kaufmann មានប្រសាសន៍ថា "យើងត្រូវរៀបចំប្លង់​​អគារសម្រាប់លំនៅឋាន និងការិយាល័យ ហើយត្រឡប់ទៅស្វែងរកលក្ខណៈដែលអាចដាក់ជាន់លើកន្លែងចតរថយន្តនៅថ្ងៃទីមួយ"។

ប៉ុន្តែមិនមែនគ្រាន់តែជាភាពលម្អិតផ្នែកខាងក្នុងដែលធ្វើឱ្យ Alta Garage មានលក្ខណៈប្លែកពីគេនោះទេ វាក៏មើលទៅមិនដូចយានដ្ឋានចំណតរថយន្តធម្មតារបស់អ្នកដែរ ពេលមើលពីខាងក្រៅ។ ដោយមានការរចនាពីវិចិត្រករ Kim West នៅរដ្ឋកាលីហ្វ័រញ៉ាដែលមានការសម្រិតសម្រាំង ព្រមទាំងមានការស្រាវជ្រាវនិងអភិវឌ្ឍន៍ពី SPMDesign សំណង់ស្នាដៃសិល្បៈស៊ីនេទិកដែលហៅថា Ode to Bohemia No. 5 (Inexhaustible Blooms) ត្រូវបានបំផុសគំនិតដោយទេសភាពរុក្ខជាតិដើមក្នុងតំបន់ និងមានគ្រឿងលោហធាតុចម្រុះពណ៌ចំនួន 97,500 ដែលឆ្លុះបញ្ចាំងពីពណ៌ខុសគ្នាពេញមួយថ្ងៃ។ ស្នាដៃសិល្បៈបញ្ចូលពណ៌ ភាពរស់រវើក និងភាពច្នៃប្រឌិត ដើម្បីកែលម្អបទពិសោធរបស់មនុស្ស។ ស្នាដៃនេះក៏ត្រូវបានរចនា ដើម្បីកុំឱ្យហួសសម័យនាពេលអនាគតដូចអគារដែរ — ផ្នែកស៊ីនេទិកអាចត្រូវបានរុះរើ និងផ្លាស់ទីទៅទីតាំងផ្សេងនៅពេលអនាគតតាមតម្រូវការ។

ទោះបីជាថ្ងៃណាមួយ Alta Garage ផ្លាស់ប្ដូរពីសំណង់រចនាសម្ព័ន្ធចតរថយន្តពេញម៉ោងក៏ដោយ ក៏ជាន់ផ្ទាល់ដីនៅតែអាចប្រើប្រាស់ជាស្ថានីយសាកថ្ម និងស្ថានីយមកយកអ្នកដំណើរសម្រាប់ AV ផងដែរ។ ដំបូលមានផ្ទាំងសូឡាផូតូវ៉ុលតា ដើម្បីជួយបង្កើតថាមពលរបស់អគារ ហើយកន្លែងចតរថយន្តនៅលើដំបូលអាចត្រូវបានផ្ដល់ជូននៅពេលអនាគតសម្រាប់អ្វីៗដូចជា ដ្រូនដឹកជញ្ជូន, ឡានហោះ ឬ AV ជាដើម។

មិនខ្វល់ថានាពេលអនាគត Alta Garage ត្រូវបានប្រើក្នុងគោលបំណងអ្វីនោះទេ សព្វថ្ងៃ វាត្រូវបានរៀបចំដោយគិតគូរអំពីពេលអនាគត។