გზა უფრო სუფთა და ჯანსაღი მომავლისკენ იმ უმნიშვნელო გადაწყვეტილებებიდან იწყება, რომელთაც ყოველდღიურად ვიღებთ. სწორად ამიტომ, მუდმივად ვეძებთ გზებს, რომ დადებითი ზემოქმედება მოვახდინოთ გარემოზე და მეტი პასუხისმგებლობით მოვეკიდოთ ენერგიის, წყლის და სხვა ბუნებრივი რესურსების მოხმარებას. Gradient Canopy-ში ამიტომაც გადავწყვიტეთ, შეგვექმნა შენობა, რომელშიც გათვალისწინებული იქნებოდა წრიული დიზაინის პრინციპები, რომლებიც ხელს უწყობს ამოწურვად ბუნებრივ რესურსებზე მოთხოვნის შემცირებას. წრიული დიზაინი მიზნად ისახავს, რომ მასალები, რაც შეიძლება დიდხანს იყოს გამოყენებული, ამიტომაც შენობის მშენებლობისას გამოყენებულ იქნა დიდი რაოდენობით გადამუშავებული და უტილიზებული მასალები.
Gradient Canopy-ს მთელ შენობაში გამოვიყენეთ 30-ზე მეტი პროდუქტი, რომელიც გადამუშავებული მასალებისგან იყო დამზადებული. მათ შორის, გადამუშავებული ხე, ველოსიპედების სადგამები, საკეტები, ხალიჩები და ფილები, რომლებიც, სხვა შემთხვევაში, ნაგავსაყრელში მოხვდებოდა. გადამუშავებული მასალების ამ მასშტაბით გამოყენებამ შენობას Materials Petal-ის სერტიფიკატი მოუტანა მომავალი ცხოვრების საერთაშორისო ინსტიტუტის (ILFI) Living Building Challenge-ისგან (LBC), რომლის მიზანია ისეთი მასალების ეკონომიკის შექმნა, რომლებიც არატოქსიკური, ეკოლოგიურად სუფთა და გამჭვირვალეა.
შენობის მოცულობის გამო, იძულებული გავხდით, შეგვემუშავებინა რამდენიმე სტრატეგია გონივრული გზებით მეორადი მასალების მოსაპოვებლად. მაგალითად, ისეთ მასალების მოძიება, როგორიცაა გადამუშავებული ფილები ან ხალიჩის საფარი, რთული აღმოჩნდა, რადგან დიზაინი მათ დიდი რაოდენობით მოითხოვდა. თან, ისინი ერთი ზომის, ფერის და მასალის უნდა ყოფილიყო.
მთავარი სტრატეგია, რომელიც გამოვიყენეთ, იყო ნივთების განმეორებითი გამოყენება ჩვენივე მასალების მარაგებიდან, რომლებიც Google-ის საწყობში ინახებოდა. ეს იმას ნიშნავს, რომ შევამოწმეთ ჩვენი დარჩენილი მარაგები, მათ შორის, ახალი ნარჩენი მასალები, რომლებიც წინა პროექტებისთვის არ გამოგვიყენებია, ასევე, ნივთები, რომლებიც ნგრევამდე შენობიდან გავიტანეთ. განვიხილეთ, რაც უკვე გვქონდა, რის საფუძველზეც შევძელით, გამოგვეყენებინა ძველი ხალიჩა, ფილები, ველოსიპედების სადგამები, კერამიკული ფილები და აკუსტიკური ჭერის ფილები.
გამოყენებული მასალების გადამუშავების კიდევ ერთი გზა იყო სხვადასხვა ადგილობრივი წყაროდან გამოტანილი გადამუშავებული ხის გამოყენება. მაგალითად, მშენებლობის დროს მოხსნილი ხის მასალა გამოვიყენეთ სკამების დასამზადებლად, რომლებიც მთელ შენობაში განთავსდა. ჩვენ ასევე მივმართეთ ადგილობრივ მომწოდებლებს გადამუშავებული ხის მისაღებად, რომელიც გამოვიყენეთ ისეთ ნივთებში, როგორიცაა ველოსიპედების საპარკინგე ადგილების კედლის პანელები და Google Store-ის იატაკი.
