ადგილის ფორმირება

Bay View-სა და Gradient Canopy-ს პროექტებით ჩვენ მიზნად დავისახეთ ისეთი ცოცხალი და სტუმართმოყვარე სივრცეების შექმნა, რომლებიც მდგრადი დიზაინის ლიდერები იქნებიან და თანაბრად სასარგებლო გახდებიან როგორც ადგილობრივი საზოგადოებისთვის, ისე Google-ისთვის. ნებისმიერ შემთხვევაში, ჩვენ ყოველთვის ვცდილობთ, ვიყოთ სასარგებლო მეზობლები. სწორედ ამიტომ, Gradient Canopy-ში ყურადღება გავამახვილეთ ინკლუზიური და სტუმართმოყვარე საზოგადოებრივი სივრცეების შექმნაზე, რომლებიც მეზობლებისთვის, ვიზიტორებისთვის და Google-ის თანამშრომლებისთვის ერთნაირად მიმზიდველი იქნება. ჩვენთვის საქმე მხოლოდ საუკეთესო სამუშაო სივრცეების დიზაინს არ ეხება, არამედ — ახალი კავშირების შექმნასაც, რომლებიც ხელს უწყობს ადგილობრივი საზოგადოებების განვითარებას.

Gradient Canopy-ს შექმნისას ყურადღებით მივუდექით შენობის გარემოსთან შერწყმას, რათა იგი ორგანულად ჩაწერილიყო ადგილობრივ კონტექსტში. შენობასა და 18-აკრიან ტერიტორიას ირგვლივ აკრავს სპეციალურად შექმნილი მწვანე სივრცე, რომელიც მოიცავს ველოსიპედისა და საფეხმავლო ბილიკებს. აქ ადამიანები შეძლებენ დატკბნენ ადგილობრივი ლანდშაფტითა და საჯარო ხელოვნების ნიმუშებით, რომლებიც შენობის გარე საჯარო სივრცეების განუყოფელი ნაწილია.

დასავლეთის მხრიდან შენობას ესაზღვრება ჩარლსტონ პარკი, რომელიც საზოგადოებას Google Visitor Experience-ში მასპინძლობს. აქ ყველასთვის რაღაც საინტერესო მოიძებნება, იქნება ეს მეგობრებთან შეხვედრა კაფეში, ღონისძიებაზე დასწრება Huddle-ში, Google Store-ში პროდუქტებისა და სერვისების დათვალიერება, ადგილობრივი ბიზნესების გაცნობა Pop-Up Shop-ში, თუ ხელოვნებისა და პროგრამების საშუალებით ცნობისმოყვარეობის დაკმაყოფილება პლაზაში. Huddle მასპინძლობს სხვადასხვა ღონისძიებასა და ვორქშოპს, რომლებიც ეძღვნება ადგილობრივი არაკომერციული ორგანიზაციებისა და საზოგადოებრივი ჯგუფების საქმიანობას. ამასთან, ის მაუნთინ ვიუს კამპუსისა და უფრო ფართო North Bayshore-ის სამეზობლოს სოციალური ჰაბის ფუნქციასაც ასრულებს.

ეს შიდა საზოგადოებრივი სივრცეები უკავშირდება დიდ გარე პლაზას, სადაც ჩვენ ვუმასპინძლებთ სამეზობლოს ღონისძიებებს და ხელს შევუწყობთ საზოგადოების წევრებსა და Google-ის თანამშრომლებს შორის მჭიდრო კავშირების ჩამოყალიბებას. პლაზაში ასევე განთავსებულია საჯარო ხელოვნების ექვსი ნიმუში და უამრავი ადგილი აუდიტორიისთვის.

North Bayshore-ში გადაადგილების გაუმჯობესების მიზნით, ვითანამშრომლეთ მაუნთინ ვიუს ქალაქის ადმინისტრაციასთან, რათა აგვეშენებინა ჩარლსტონის სატრანზიტო კორიდორის პირველი ნაწილი. ეს ინიციატივა ხელს შეუწყობს საზოგადოებრივ ტრანსპორტს, გააუმჯობესებს ველოსიპედისტებისა და ფეხით მოსიარულეთა უსაფრთხოებას და გაამარტივებს North Bayshore-ში მანქანის გარეშე გადაადგილებას. Gradient Canopy-ს პროექტის ფარგლებში, ჩარლსტონ როუდზე, კამპუსის მოსაზღვრედ, ორი სატრანსპორტო ცენტრი აშენდა. ეს ინფრასტრუქტურა, ჩარლსტონ როუდსა და შორლაინ ბულვარზე დაგეგმილ მხოლოდ ავტობუსებისთვის განკუთვნილ ზოლებთან ერთად, გააუმჯობესებს რეგიონის სატრანსპორტო შესაძლებლობებს.

ჩარლსტონის სატრანზიტო კორიდორი ასევე მოიცავს მსოფლიო დონის ველო და საფეხმავლო ბილიკებს, მათ შორის, მე-4 კლასის ტიპის განცალკევებულ ველობილიკებს, რომლებიც ასევე ცნობილია, როგორც ველოტრეკები. შენობის შიგნით ხელს ვუწყობთ „ორბორბლიანი“ ტრანსპორტით მგზავრობას, უზრუნველვყოფთ სადგომს 780-ზე მეტი ველოსიპედისთვის, ასევე, ველოსიპედის საკეტებსა და საშხაპე სივრცეებს.

შენიშვნა მკითხველებისთვის: ეს სტატია თავდაპირველად გამოქვეყნდა 2022 წლის მაისში და განახლდა 2023 წლის აგვისტოში, რათა ასახოს პროექტის უახლესი დეტალები.