हामीले ग्रेडिएन्ट क्यानोपी भवनमा नै Living Future Institute (ILFI) ले सञ्चालन गरेको Living Building Challenge (LBC) कार्यक्रमअन्तर्गत प्रदान गरिने मटरियल्स पेटल प्रमाणपत्र प्राप्त गरेका हौँ। यो भवन निर्माण गर्ने क्रममा मानिस तथा अन्य जीवजन्तुको स्वास्थ्यमा प्रतिकूल असर नपुर्याउने खालका सामग्री प्रयोग गर्ने तरिकाहरू खोज्ने कार्य अति महत्त्वपूर्ण थियो। त्यसकारण हामीले निरन्तर हुर्कने तथा कार्बन सञ्चित गर्ने काठका विशेषताहरूको लाभ उठाउने प्रयोजनका लागि भवनमा दिगो स्रोतबाट प्राप्त मास टिम्बर प्रयोग गर्ने तरिकाहरूको अन्वेषण गर्यौँ।
मास टिम्बर भनेको भवन निर्माण गर्ने परम्परागत विधिहरूको तुलनामा भवनबाट उत्सर्जन हुने कार्बनको मात्रा कम गर्न सकिने तरिका अपनाएर सँगै कम्प्रेस गरिएको काठ प्रयोग गरी पिलर, बिम, भित्ता, तला तथा छतहरू बनाउने विधि हो। अन्ततः मास टिम्बरले भवन निर्माणमा मुख्य भूमिका खेल्छ र हामीले यो भवन निर्माण गर्ने क्रममा सिकेको कुरा Google का अन्य निर्माण परियोजनामा पनि लागू गरेका छौँ।
मास टिम्बरका बायोफिलिक विशेषताका कारणले गर्दा यसको प्रयोग गरी स्वास्थ्यका हिसाबले अझ राम्रा, थप उत्पादनशील र आकर्षक तथा प्रेरणादायी कार्यस्थलहरू बनाउन सकिने भएकाले हामी केही समयदेखि आफ्ना सबै निर्माण परियोजनामा मास टिम्बर प्रयोग गरिरहेका छौँ। बायोफिलिया भनेको डिजाइनमा प्राकृतिक सामग्री प्रयोग गरी मानिसले सफलता हासिल गर्ने ठाउँहरू बनाउनु हो र भवनभित्र देखिने ठाउँमा काठ प्रयोग गरी विभिन्न संरचना बनाउँदा कोटिङ र पेन्ट जस्ता अतिरिक्त सामग्री प्रयोग गर्नु पर्ने आवश्यकता कम मात्र नभई भित्रै हुँदा पनि मानिसलाई प्रकृतिसँग जोडिएको महसुस गराउन पनि मद्दत पुग्छ। त्यसैले ग्रेडिएन्ट क्यानोपी भवनको डिजाइन बनाउन थाल्दा हामीले सुरुमा मास टिम्बर प्रयोग गरी यो भवनको समग्र संरचना बनाउने सम्भावनाको अन्वेषण गरेका थियौँ। हामीले चाहेका जस्ता लामा पिलर वा बिम मास टिम्बर प्रयोग गरी बनाउन सम्भव नभए तापनि हामीले सो भवनभित्रका केही संरचना भने काठ प्रयोग गरी बनाउन सफल भएका थियौँ।
ग्रेडिएन्ट क्यानोपी भवनमा मास टिम्बरलाई अझ राम्रो संरचनात्मक कडापना प्राप्त गर्नका निम्ति काठका विभिन्न टुक्रा चप्काएर बनाइएको इन्जिनियर्ड वुडको स्वरूप अर्थात् क्रस-लेमिनेटेड टिम्बर (CLT) का रूपमा प्रयोग गरिएको छ। हामीले संयुक्त सबलता प्रदान गर्ने फर्मवर्क (जुन साँचोमा कङ्क्रिट भरिन्छ) का रूपमा CLT प्रयोग गरी पहिलो तलाको कङ्क्रिट संरचना बनाउन थाल्यौँ। हामीले CLT विशेष तरिकाले प्रयोग गरेका छौँ। सामान्यतया कङ्क्रिट सेट भएपछि यसलाई हटाइन्छ तर हामीले यसलाई भुइँ तलाको बाहिरको काठको छतका साथै भित्री प्राङ्गणमा गार्डरेलको पनि काम गर्ने गरी त्यहीँ छाडेका छौँ। यो भवनभरिका ढोका तथा ती ढोकाका फ्रेम (विशेष गरी मिटिङ पड तथा सम्मेलन कक्षहरू) बनाउन पनि काठ प्रयोग गरिएको छ। यस क्रममा टोलीले विक्रेतासँग सहकार्य गरेर समग्र ढोकाको संरचनाका हकमा "Declare" लेबल प्राप्त गर्न सक्यो। सो लेबलका कारणले गर्दा हामीलाई भवनका बाँकी हिस्सामा स्वास्थ्यमा असर नगर्ने आन्तरिक वातावरण बनाउन मद्दत पुर्याउने खालका सामग्रीलाई प्राथमिकता दिन मद्दत पुग्यो।
