५ मिनेट
"उत्कृष्ट डिजाइन कहिल्यै पनि एउटा कुरा मात्र नभई समग्र, विस्तृत तथा प्रयोगकर्ता मैत्री तरिका हो। यसले प्रत्यक्ष वा भर्चुअलमध्ये जुनसुकै रूपमा सजिलैसँग सहकार्य गर्न सकिने ठाउँहरू बनाउँछ।"
– Ruth Porat, अध्यक्ष तथा मुख्य लगानी अधिकारी र Alphabet तथा Google को मुख्य वित्तीय अधिकारी
तपाईंको माउन्टेन भ्यू र त्यस वरपरका क्षेत्रहरूसँग व्यक्तिगत सम्बन्ध कस्तो छ?
म पालो अल्टोमा हुर्केको हुँ। म बच्चा छँदै संयुक्त अधिराज्यबाट क्याम्ब्रिज, म्यासाचुसेट्स हुँदै बसाइँ सरेर त्यहाँ आएको हुँ। मेरा बुबा स्ट्यान्फोर्डको लिनियर एक्सेलेरेटर सेन्टरमा चिकित्सक हुनुहुन्थ्यो। बुबाले मेरो परिवारलाई बसाइँ सारेर यहाँ ल्याउनुको एक मुख्य कारण जीवन्तता, बौद्धिक चासो र पहिला कहिले पनि नगरिएका काम गर्ने लक्ष्य थियो। त्यस्ता काममा स्ट्यान्फोर्डमा रहेको आणविक कणहरू तीव्र गतिमा चलाउने उपकरण बनाउने जस्ता कामहरू पर्छन्। मेरा बुबाले हामीलाई बसाइँ सारेर यहाँ ल्याएपछि यहाँको जीवन्तता नाटकीय रूपमा विस्तार भएको छ।
ग्लास्गो, स्कटल्यान्डमा अवस्थित COP26 मा Google तथा Alphabet को CFO Ruth Porat।
यो क्षेत्रमा के कुरा एकदमै विशेष छ भन्ने बारेमा हामीलाई थप बताउन सक्नुहुन्छ?
यहाँ नयाँ परिवर्तनको संस्कृति व्यापक छ र यो हरेक दिन चर्चाको विषय बन्छ। यहाँका अधिकांश व्यक्तिसँग संसारमा कुनै परिवर्तन ल्याउने गहन प्रतिबद्धता छ। यही प्रतिबद्धताले नै हामीलाई Google र Alphabet मा काम गर्न हौसला दिन्छ र यही हौसलाकै कारण यहाँ बस्न र काम गर्न चाहने सबैले यो ठाउँ रोजेका हुन् भन्ने कुरामा म विश्वस्त छु। यस भ्यालीमा हामीले देख्न चाहेको भविष्य बनाउने उत्साह छ र मेरो विचारमा यो कुराले यो ठाउँलाई संसारका सबैभन्दा विशेष ठाउँमध्ये एक बनाउँछ।
Google को माउन्टेन भ्यूसँग कस्तो सम्बन्ध छ?
Google ले १९९९ देखि नै माउन्टेन भ्यूलाई आफ्नो घर मानेको छ र हामी आगामी धेरै वर्ष यहीँ रहिरहन सक्ने सम्भावना देख्छौँ। हामीलाई माउन्टेन भ्यूमा रहेका सबै कुरा मन पर्ने भएकाले नै Google ले आफ्नो मुख्यालय बनाउन यो ठाउँ रोजेको हो। हामी खाडीको सुन्दरता, विश्वविद्यालयहरूको निकटता, परिवारमैत्री वातावरण र सिलिकन भ्यालीको केन्द्रमा रहेको सहरमा काम गर्ने अवसर मन पराउँछौँ।
हाम्रा धेरै कर्मचारीहरू माउन्टेन भ्यूमा बस्छन् र यहीँ काम गर्छन् र एक कम्पनीका रूपमा हामी उनीहरूका राम्रा छिमेकी हौँ भन्ने कुरामा विश्वस्त छौँ। वर्षौँदेखि हामीले समुदायमा दशौँ लाख डलर लगानी गरेका छौँ। तिनमा STEM शिक्षालाई सहयोग गर्न माउन्टेन भ्यू एजुकेसनल फाउन्डेसनमा अनुदान दिने, माउन्टेन भ्यूको सामुदायिक सटलमा आर्थिक सहयोग गर्ने, घरबारविहीनहरूका समस्या सुल्झाउने र तिनको रोकथाम गर्ने सेवाहरूलाई र Charleston Retention Basin जस्ता वातावरण पुनर्स्थापना गर्ने परियोजनाहरूलाई अनुदान दिने जस्ता कुराहरू पर्छन्।
र हरेक वर्ष Google का कर्मचारीले माउन्टेन भ्यूमा रहेका माउन्टेन भ्यूको सामुदायिक सेवा एजेन्सी, सिलिकन भ्याली बाइसिकल एक्स्चेन्ज, माउन्टेन भ्यूका स्कुलहरू र अद्वितीय कम्प्युटर हिस्ट्री म्युजियमलगायतका संस्थाहरूमा हजारौँ घण्टा स्वयंसेवक भएर काम गर्ने कुरामा हामी गर्व गर्छौँ।
ग्रेडिएन्ट क्यानोपी र बे भ्यूले यो क्षेत्रसँग स्थापित Google को दीर्घकालीन सम्बन्धलाई कसरी निरन्तरता दिएका छन्?
ग्रेडिएन्ट क्यानोपी हामीले माउन्टेन भ्यूमा गरेको सबैभन्दा पहिलो भौतिक विकास हो र हामीले यस परियोजनामा नर्थ बेसोरको भविष्यप्रतिको यस सहरको दृष्टिकोण कसरी उत्कृष्ट तरिकाले समेट्न सकिन्छ भनेर लामो समय गम्भीर रूपमा सोच्यौँ। ग्रेडियन्ट क्यानोपीले समुदायलाई स्वागत गर्ने, प्राकृतिक वातावरणलाई सुन्दर तरिकाले समेट्ने, सहरलाई आर्थिक रूपमा समृद्ध बनाउने र माउन्टेन भ्यूमा बस्न र काम गर्न मन पराउने हाम्रा कर्मचारीहरूलाई पनि सहयोग गर्ने उद्देश्यपूर्ण डिजाइनका साथ कार्यस्थानको परिभाषा नै बदलेको छ।
कोभिड महामारीभन्दा अगाडिदेखि नै Google का कार्यस्थानहरू केही “Googley” तरिकाले बनाइएका स्वस्थकर, दिगा र काम गर्न सजिला स्थान भएको चर्चा हुने गरेको छ। उत्कृष्ट डिजाइनले कुनै पनि ठाउँलाई बसौँ बसौँ लाग्ने बनाउँछ। महामारीपछि हाम्रा कार्यालयहरू सुरक्षित रूपमा खुलेपछि विश्वभर रहेको हाम्रो जनशक्तिको आधा हिस्सा स्वैच्छिक रूपमा कार्यालय फर्कनुले पनि यो कुरा पुष्टि गर्छ। हाल हामी हाम्रा भौतिक परियोजनामार्फत स्थानीय समुदायमा धेरै प्रतिबद्धता पूरा गर्न र सिकाइलाई अघि बढाउन सक्ने भएका छौँ। हामी यी स्थानहरूले कसरी समुदायसँग अन्तर्क्रिया गर्न सघाउँछन् र जुझारुपन निर्माण गर्छन् र स्वास्थ्यमा सकारात्मक प्रभाव पार्छन् भन्ने कुरामा केन्द्रित छौँ।
बे भ्यूको इभेन्ट सेन्टरको लबीबाट बाहिरपट्टिको भूदृश्य र पृष्ठभूमिमा NASA को विन्ड टनेल देखिएको फोटो।
Google ले “उत्कृष्ट डिजाइन” लाई कसरी परिभाषित गर्छ भन्ने बारेमा थप बताउन सक्नुहुन्छ?
उत्कृष्ट डिजाइन कहिल्यै पनि एउटा कुरा मात्र होइन – यो समग्र, विस्तृत तथा प्रयोगकर्ता मैत्री तरिका हो। यो विधिमा समाजमा घुलमिल हुने, सिक्ने, सहकार्य गर्ने र कुनै कार्यमा केन्द्रित हुने अवसरहरू समेटिएका छन्। यसले प्रत्यक्ष वा भर्चुअल रूपमा सजिलैसँग सहकार्य गर्न सकिने ठाउँहरू बनाउँछ।
बे भ्यू र ग्रेडिएन्ट क्यानोपीको डिजाइन बनाउन प्रयोग गरिएका विशेष आइडियाहरूमा यो कुरा कसरी लागू हुन्छ?
सुरुदेखि नै हाम्रा कार्यालयहरूको डिजाइनलाई Google का संस्थापकहरूको “प्रयोगकर्तामा केन्द्रित हुनुहोस्, बाँकी सबै कुरा त्यसपछि आउँछन्” भन्ने सिद्धान्तले निर्देशित गरेको छ। यो परियोजनामा कुन कुराले कर्मचारीहरूलाई सबैभन्दा उत्पादनमूलक र सिर्जनात्मक बनाउँछ भन्ने बारेमा वर्षौँसम्म गरिएका शोधहरूबाट प्राप्त तथ्याङ्क र विज्ञान प्रयोग गरिएको थियो।
हामीले अन्वेषण गरेको पहिलो आइडिया ध्यान केन्द्रित गरेर काम गर्ने र सहकार्य गर्ने स्थानहरूको र ती स्थानहरू खुला हुने कि बन्द हुने भन्ने कुराको सम्बन्ध उल्टाउँदै कार्यालयको भित्री कुरा बाहिर देखाउने कुरासँग सम्बन्धित थियो। यसको मतलब हामी ध्यान केन्द्रित गरेर काम गर्न चुनौतीपूर्ण हुने गरी खुला स्थानमा डेस्क राख्ने कुरालाई बदलेर बन्द कुनामा डेस्क राख्ने निचोडमा पुगेका छौँ। त्यसको ठिक विपरित हामी टोलीले गर्ने सहकार्यका प्रकारका आधारमा छलफल गर्ने बन्द कोठाहरूबाट खुला र आवश्यकताअनुसार परिमार्जन गर्न सकिने सहकार्य गर्ने विभिन्न स्थानहरू बनाउने निचोडमा पुगेका छौँ। टाढाका सहकर्मीहरूलाई समान रूपमा सहभागिता जनाउन सक्षम बनाउन यी सहकार्य गर्ने स्थानहरूमा प्रविधिको प्रयोग एकदमै महत्त्वपूर्ण छ। सहकार्य गर्ने यी गतिशील स्थानहरू ध्यान केन्द्रित गरेर काम गर्ने कुनाहरूको नजिकै बनाइएका कारण मानिसहरू आवश्यकताअनुसार तत्काल एक प्रकारको कार्यबाट अर्को प्रकारको कार्यमा सहभागी हुन सक्छन्।
दोस्रो तल्ला र मिलेर काम गरिरहेका छिमेकीहरूको गाउँ देखिएको फोटो।
अर्को आइडिया बायोफिलियाले बोध पक्षमा पुर्याउने लाभहरूसँग सम्बन्धित छ। हामी वर्षौँदेखि हाम्रा कार्यालयहरूमा बायोफिलिक डिजाइन समावेश गर्ने कुरामा काम गरिरहेका छौँ – यो हाम्रा कार्यालयहरूमा स्वस्थ सामग्री, प्राकृतिक सामग्री, बनावट, आवाजको व्यवस्थापन, तापक्रमको सहजता, मिलाउन सकिने हावाको बहाव र शारीरिक, मानसिक र व्यवहारिक परिवर्तनलाई सन्तुलित राख्ने खालको प्रकाश व्यवस्था जस्ता प्रकृतिका मुख्य पक्षहरू समावेश गर्ने कार्य हो।
केही मानिसहरूलाई यी बायोफिलिक वा हावाको गुणस्तर कायम राख्ने उपायहरूमा अनावश्यक रूपमा पैसा खर्च गरिएको जस्तो लाग्न सक्छ तर कार्यस्थानमा प्रकृति र हावाको गुणस्तरलाई बढी मात्रामा समावेश गर्नुमा आर्थिक कारणहरू पनि छन्। यो सबै कुरा मानिसहरूको जीवनको गुणस्तर सुधार गर्ने कुरासँग सम्बन्धित छ र कर्मचारीहरू स्वस्थ, खुसी र उत्कृष्ट रूपमा काम गर्न सक्षम हुँदा कम्पनीलगायत सबै मानिसहरू लाभान्वित हुन्छन्।
यो कुरा Google को समुदाय-केन्द्रित विकाससँग सम्बन्धित ठुला लक्ष्यहरूसँग कसरी सम्बन्धित छ?
हाम्रो लक्ष्य समुदायको मर्म बोकेका हामीले काम गर्ने तथा हामी बस्ने भुइँ तलाका जीवन्त स्थानहरूका सहायताले स्थानीय समुदायसँग जोडिनु र एकीकृत हुनु हो। हामी हाम्रा र समुदायका मान्यता प्रतिबिम्बित गर्ने स्थानहरूमा लगानी गर्नुको दीर्घकालीन मूल्य देख्छौँ।
सर्वप्रथम मे २०२२ मा प्रकाशित
