ယာဉ်ရပ်နားသည့်နေရာမှ လူနေအဆောက်အအုံသို့

ပုံမှန်အားဖြင့် ကားရပ်နားရန်နေရာများသည် ဗိသုကာလက်ရာအရ ဆန်းပြားမှုမရှိပါ — ၎င်းတို့သည် လူ့အဖွဲ့အစည်းတွင် လက်တွေ့အသုံးဝင်သော ရည်ရွယ်ချက်အနေဖြင့်ရှိပြီး လူများကို သူတို့၏ဦးတည်ရာသို့ ခေါ်ဆောင်သွားရန်အတွက် ကားများလိုအပ်သေးသည်။ သို့သော် ကားများနည်းပြီး ရေရှည်တည်တံ့သော သယ်ယူပို့ဆောင်ရေးပုံစံများ ဖြစ်နိုင်ခြေရှိသော အနာဂတ်ကို မျှော်မှန်းကြည့်ပါက ကားပါကင်နေရာ လိုအပ်မှု လျော့နည်းသွားဖွယ်ရှိသည်။ ၎င်းက ကာဗွန်ထုတ်လွှတ်မှုနှင့် ယာဉ်ကြောပိတ်ဆို့မှုကို လျှော့ချပေးနိုင်သည်။ ရပ်နားရန်အတွက်သာသုံးသော ယာဉ်ရပ်နားရာနေရာများသည် သက်ဆိုင်မှုမရှိတော့ဘဲ ဖြိုဖျက်ရနိုင်ဖွယ်ရှိသောကြောင့် စွန့်ပစ်ပစ္စည်း၊ ကာဗွန်နှင့် ကုန်ကျစရိတ်များ တိုးစေသည်။ ထို့ကြောင့် မောင်တိန်းဗျူးရှိ Google ၏ Alta Garage အသစ်သည် တစ်နေ့နေ့တွင် ကားရပ်နားရန်နေရာမဟုတ်တော့ဘဲ အချိန်မရွေး လုပ်ငန်းသုံး၊ လူနေထိုင်ရာ (သို့) ကွန်မြူနတီသုံး အဖြစ်သို့ ပြောင်းလဲရန်အတွက် အသင့်ရှိနေရန် ရည်ရွယ်ကာ ဒီဇိုင်းထုတ်ထားခြင်းဖြစ်သည်။

လူ့အဖွဲ့အစည်း၏ လိုအပ်ချက် ပြောင်းလဲလာသည်နှင့်အမျှ Alta Garage လည်း ပြောင်းလဲနိုင်သည့်အတွက် ဤစိတ်ကူးကို အနာဂတ်နှင့် လိုက်လျောညီထွေရှိသော ယာဉ်ရပ်နားရန်နေရာဟု ခေါ်သည်။ ရုံးခန်း၊ အိမ်ရာ၊ ဆိုင်ခန်းများ (သို့) ပွဲလမ်းနေရာ ပိုလိုအပ်ပါသလား။ Alta Garage က ယာဉ်ရပ်နားရန်နေရာ လိုအပ်ချက် နည်းလာသည်နှင့်အမျှ ထိုအရာများအဖြစ် ပြောင်းလဲနိုင်သည်။ ကုန်ကျစရိတ်သက်သာစေသော၊ အချိန်ကုန်သက်သာစေသော၊ စွန့်ပစ်ပစ္စည်း လျော့နည်းစေသော၊ ရေရှည်တည်တံ့မှု တိုးစေသော နည်းလမ်းဖြင့် လုပ်နိုင်သည်။

ကားကြုံအစီအစဉ်များ၊ အလိုအလျောက်မောင်းနှင်သော ယာဉ်များ၊ ပတ်ဝန်းကျင်နှင့် သဟဇာတပိုဖြစ်သော ရွေးချယ်မှုများ ပြုလုပ်နိုင်ရန် ကူညီပေးနိုင်မည့် နည်းပညာ တို့အပါဝင် ရေရှည်တည်တံ့သော သယ်ယူပို့ဆောင်ရေးဖြေရှင်းနည်းများတွင် ရင်းနှီးမြှုပ်နှံရန် ကတိကဝတ်ပြုထားသည်မှာ ကြာပါပြီ။ Alta Garage ကို အနာဂတ်နှင့် လိုက်လျောညီထွေရှိသော ဒီဇိုင်းနှင့်အတူ ရေရှည်တည်တံ့သော သွားလာရေးနည်းလမ်းများကို အားပေးပြီး ကားနည်းသော ဝန်းကျင်ဒေသဖြစ်စေရန်အတွက် ‘မောင်တိန်ဗျူး၏ မြို့တော်’ စိတ်ကူးရည်မှန်းချက်ကိုလည်း ပံ့ပိုးကာ တည်ဆောက်ထားသည်။

သို့သော် ယခုလက်တွေ့အသုံးဝင်ပြီး ဖြစ်လာနိုင်သည့် အနာဂတ် အသုံးပြုမှုအမျိုးမျိုးအတွက် ယာဉ်ရပ်နားရန်နေရာကို ဘယ်လိုဒီဇိုင်းလုပ်မလဲ။ ၂၀၁၈ ခုနှစ်တွင် Google ၏ အိမ်ခြံမြေ သုတေသနနှင့် ဖွံ့ဖြိုးတိုးတက်မှုအဖွဲ့က ဤမေးခွန်းကို စတင်ဆွေးနွေးခဲ့ကြသည်။ ကားသမားတစ်ဦးတည်းစနစ်မှ ဘက်စ်ကား၊ စက်ဘီး၊ မောင်းသူမဲ့ယာဉ် (AV များ) ကဲ့သို့ ကာဗွန်ထုတ်လွှတ်မှုနည်းသော စနစ်များသို့ ပြောင်းလိုသော Google တည်ထောင်သူများ၏ ဆန္ဒဖြင့် ၎င်းကို စေ့ဆော်ထားသည်။

“အနာဂတ်မှာ ဖြစ်လာသမျှနဲ့ အလိုက်သင့်ပြောင်းနိုင်ဖို့ တည်ဆောက်လိုပါတယ်” ဟု Google ၏ ‘တည်ဆောက်ထားသည့် ပတ်ဝန်းကျင်အတွက် R+D Lab’ ၏ ဒါရိုက်တာ မီရှဲလ်ခေါက်ဖ်မန်းက ပြောကြားသည်။ “ကုန်ကျစရိတ်နည်းပါးပြီး လိုက်လျောညီထွေရှိတဲ့ အဆောက်အအုံတစ်ခု ဖြစ်စေဖို့အတွက် လိုအပ်ချက်တွေကို ဖော်ထုတ်ဖို့ စမ်းသပ်ခန်းမှာ ဆောက်လုပ်ရေးနည်းပညာ၊ ပစ္စည်း၊ အရွယ်အစား၊ နည်းဗျူဟာအမျိုးမျိုးကို သုတေသနပြုခဲ့ပါတယ်။”

အဓိကအချက်မှာ ပြောင်းလွယ်ပြင်လွယ်ပြီး လိုက်လျောညီထွေဖြစ်သော အဆောက်အအုံအခြေခံ အတွင်းသားနှင့် ကိုယ်ထည်ကို တည်ဆောက်ခြင်းဖြစ်သည်။ ဤသို့ဖြင့် ကားရပ်ရန်နေရာသည် တစ်နေ့နေ့တွင် လိုအပ်ပါက ဒုတိယအကြိမ် ပြန်အသုံးဝင်နိုင်သည်။ ၎င်း၏ လက်ရှိဖွဲ့စည်းပုံတွင် ယာဉ်ရပ်နားရန်နေရာသည် ကားအစီးရေ ၁,၇၀၀ ကျော်ဆံ့ပြီး လျှပ်စစ်ကား အားသွင်းနေရာ ၄၅၀ ကျော်လည်းရှိသည်။ Google ဝန်ထမ်းများအပြင် Google Visitor Experience ၏ ဧည့်သည်များအတွက်ပါ ယာဉ်ရပ်နားနိုင်ရန် ပံ့ပိုးပေးသည်။ ယာဉ်ရပ်နားရန် စောင်းလျှောကို စင်နှင့် အတွင်းလှေကားများအဖြစ် ပြောင်းလိုက်ပါက အတွင်းပိုင်းအနိမ့်အမြင့်များသည် တစ်နေ့နေ့တွင် ဆိုင်ခန်း၊ ရုံးခန်း (သို့) အိမ်ရာများ ဖြစ်လာနိုင်သည်။ ပြောင်းလဲရာတွင် လွယ်ကူစေရန်အတွက် အနာဂတ်အခြေအနေများတွင် နေ့အလင်းရောင်ရရှိမှုအတွက် လေ့လာမှုများကိုပင် ပြုလုပ်ခဲ့ပါသည်။ ကြမ်းပြင်အမြင့်နှင့် စောင်းလျှောများကို ဖယ်ရှားခြင်းဖြင့် နေ့အလင်းရောင် အများဆုံးရရှိစေမည်။ ဤအပြောင်းအလဲကို လွယ်ကူချောမောစေရန်အတွက် ပုံမှန်ယာဉ်ရပ်နားရန်နေရာများမှ ကွဲပြားစေသည့် ဒီဇိုင်းအစိတ်အပိုင်းများစွာကို ပေါင်းစပ်နိုင်ရန် Clark Pacific၊ Gensler၊ Hollollins၊ International Parking Design၊ Ellis Partners၊ SPMD Design၊ အခြားပါတနာများနှင့်အတူ အနီးကပ် လက်တွဲလုပ်ကိုင်ခဲ့ပါသည်။

“ဥပမာပေးရမယ်ဆိုရင် ယာဉ်ရပ်နားဖို့နေရာမှာ အလွန်ကြီးတဲ့ ကြမ်းခင်းနဲ့ အလွန်မြင့်တဲ့ မျက်နှာကြက်တွေရှိပြီး အဲဒါတွေက ရုံးခန်း ဒါမှမဟုတ် လက်လီရောင်းချတဲ့နေရာတွေရဲ့ အတိုင်းအတာတွေနဲ့ ပိုကိုက်ညီပါတယ်” ဟု Google ရှိ ဆောက်လုပ်ရေး ဒါရိုက်တာ ဂျက်ဖရီ ကာရီက ပြောသည်။ “အထပ်များကြား ကားများအသုံးပြုသော စောင်းလျှောများကို ပြန်ဖြုတ်နိုင်ပြီး အမိုးပွင့်များ၊ ခြံဝင်းများ (သို့) လှေကားထစ်များပြုလုပ်ရန် ဖယ်ရှားခြင်းဖြင့် အနာဂတ် အတွင်းပိုင်းနေရာသို့ နေ့အလင်းရောင် လွှမ်းခြုံသွားပါမည်။

ထို့အပြင် ရေနုတ်မြောင်းများပါသော မြေပြန့်ကြမ်းပြင်များ သုံးခြင်းဖြင့် ကြမ်းပြင်တွင် စောင်းလျှောများကို ဖယ်ရှားသောကြောင့် အနာဂတ် ယာဉ်ရပ်နားရန်နေရာ အပြောင်းအလဲကို လွယ်ကူစေသည်။ ကြိုတင်ပုံစံလောင်းထားသော ကွန်ကရစ်က ပိုများသည့်ဝန်အားကို ထိန်းနိုင်ရန် အားဖြည့်ထားပြီး စီးပွားရေး (သို့) လူနေထိုင်သော အဆောက်အအုံအတွက် လိုက်ဖက်မှုရှိသည်။ ၎င်းက လိုက်ကာနံရံ တပ်ဆင်ခြင်းကိုလည်း ခွင့်ပြုသဖြင့် ပြောင်းထားသော အဆောက်အအုံကို အပိုင်းများအဖြစ် ထပ်ဆင့်ပိုင်းခြားနိုင်သည်။ ဖွဲ့စည်းတည်ဆောက်မှုဆိုင်ရာ နေရာလွတ်များသည် အနာဂတ်ရေပိုက်နှင့် လျှပ်စစ်လိုင်းများ လမ်းကြောင်းဆွဲရန် ပိုမိုလွယ်ကူစေသည်။

Alta Garage ကို အနာဂတ်တွင် ယာဉ်ရပ်နားရန်နေရာတစ်ပိုင်း၊ ရုံးတစ်ပိုင်း ဖြစ်စေရန်အတွက် (သို့) အခြားတစ်ခုအနေဖြင့် လုံးဝပြောင်းလဲသုံးနိုင်ရန်အတွက် ပြောင်းလွယ်ပြင်လွယ်ရှိစေရန် ပြုလုပ်ထားခြင်းဖြစ်သည်။ ဗိသုကာအနုပညာရှင်များအတွက် အနာဂတ်နှင့် လိုက်လျောညီထွေရှိခြင်းဆိုသည်မှာ ယာဉ်ရပ်နားရန်နေရာကို ဒီဇိုင်းဆွဲသည့်အတိုင်း ပြန်ဖျက်-ပြန်တည်ဆောက်နိုင်ခြင်းကို အခြေခံအားဖြင့် ဆိုလိုသည်။ အနာဂတ် ရုံးနေရာတွင် လှေကားနှင့် ဓာတ်လှေကားနေရာများသည် မည်သည့်နေရာတွင် ရှိနိုင်သလဲ။ တိုက်ခန်းအဆောက်အအုံတစ်ခုအတွက် လိုအပ်နိုင်သော ရေပိုက်ဆက်သွယ်မှုစနစ်၊ အပူနှင့် အအေးပေးစနစ်များအတွက် နေရာကို ဘယ်မှာထားမလဲ။ “အိမ်ရာနဲ့ ရုံးတွေအတွက် ပုံစံပြမြေပုံစာရွက်ကို နေရာချပြီး ယာဉ်ရပ်နားဖို့နေရာနဲ့ ထပ်နေတဲ့နေရာတွေကိုရှာဖို့ စစချင်းမှာပဲ ပြောင်းပြန်တွက်ချက်ရပါတယ်” ဟု ခေါက်ဖ်မန်းက ပြောသည်။

အတွင်းပိုင်း အသေးစိတ်ကြောင့်သာ Alta Garage က ထူးခြားနေခြင်းမဟုတ်ဘဲ အပြင်ဘက်မှ ကြည့်လျှင်လည်း သာမန် ယာဉ်ရပ်နားရန်နေရာနှင့် မတူပါ။ ကယ်လီဖိုးနီးယား အနုပညာရှင် ကင်မ်ဝက်စ်က ဒီဇိုင်းပြုလုပ်ထားပြီး SPMDesign က သုတေသနနှင့် အကောင်အထည်ဖော်ဆောင်ရွက်ကာ Ode to Bohemia No. 5 (Inexhaustible Blooms) ဟုခေါ်သော ပြောင်းလဲနိုင်သည့် အနုပညာမျက်နှာစာကို ဒေသတွင်းအပင်ရှုခင်းအပေါ် စိတ်ကူးစိတ်သန်းရယူထားပြီး တစ်နေ့တာလုံး အရောင်အသွေးစုံ ရောင်ပြန်ဟပ်သော အရောင်စုံသတ္တုအစိတ်အပိုင်း ၉၇,၅၀၀ ပါဝင်သည်။ လူ့စိတ်ခံစားမှု ပိုကောင်းမွန်စေရန်အတွက် အနုပညာလက်ရာတွင် အရောင်၊ စိုလွင်မှု၊ ဖန်တီးမှုတို့ကို ထပ်ပေါင်းထည့်ပေးသည်။ ၎င်းကိုလည်း အဆောက်အအုံကဲ့သို့ အနာဂတ်နှင့် လိုက်လျောညီထွေရှိစေရန် ဒီဇိုင်းပြုလုပ်ထားသည်။ အနာဂတ်တွင် အစိတ်အပိုင်းများကို ဖြုတ်ပြီး အခြားနေရာတစ်ခုသို့ လိုအပ်သလို ရွှေ့နိုင်သည်။

Alta Garage သည် တစ်နေ့တွင် အချိန်ပြည့် ယာဉ်ရပ်နားရန်နေရာအဖြစ်မှ ပြောင်းလဲနိုင်သော်လည်း မြေညီထပ်သည် AV များအတွက် အားသွင်းရုံနှင့် ပစ္စည်းကောက်သည့်နေရာအဖြစ် ဆက်လက်လုပ်ဆောင်နိုင်သေးသည်။ ခေါင်မိုးတွင် နေရောင်ခြည်မှ လျှပ်စစ်စွမ်းအင်ထုတ်သော ဆိုလာပြားများရှိပြီး အဆောက်အအုံအတွက် စွမ်းအင်ကူထုတ်ပေးသည်။ အပေါ်ဆုံးထပ်ရှိ ယာဉ်ရပ်နားရန်နေရာကို အနာဂတ်တွင် ဒရုန်းဖြင့် ပစ္စည်းပို့ခြင်း၊ မိုးပျံကား (သို့) AV များအတွက် သုံးနိုင်သည်။

အနာဂတ်တွင် မည်သို့ရှိသည်ဖြစ်စေ Alta Garage ကို သုံးနိုင်သည်။ အနာဂတ်ကိုမျှော်မှန်းပြီး မျက်မှောက်တွင် စီစဉ်ထားခြင်းဖြစ်သည်။