ငှက်များနှင့်ကိုက်ညီသော ဒီဇိုင်း

Gradient Canopy နှင့်အတူ ရည်မှန်းချက်ပန်းတိုင်တစ်ခုမှာ သဘာဝအခင်းအကျင်းနှင့် ပေါင်းစပ်ပြီး အချိန်ကြာသည်နှင့်အမျှ ပိုမိုခံနိုင်ရည်ရှိသည့်နည်းလမ်းဖြင့် စီမံကိန်းနေရာတစ်ခု ပြုလုပ်ရန် ဖြစ်သည်။ ကျွန်ုပ်တို့အတွက် “ခံနိုင်ရည်ရှိမှု” ဟူသည်မှာ ဒေသ၏ ဂေဟစနစ် ရေရှည်တည်တံ့ကောင်းမွန်ရေးတွင် ပံ့ပိုးပါဝင်သည့် နေရာများကိုဆိုလိုပြီး ၎င်းတွင် ရာသီဥတုအပြောင်းအလဲများ ရှိလာသည့်တိုင် လူရော၊ တောရိုင်းတိရစ္ဆာန်များပါ ရှင်သန်တိုးတက်နိုင်သည်။ Gradient Canopy တွင် တောရိုင်းတိရစ္ဆာန်များအတွက် အရေးပါသော အထောက်အပံ့ ပံ့ပိုးသည့် သမိုင်းဝင်ဂေဟစနစ် အစိတ်အပိုင်းများကို ပြန်လည်ထူထောင်ရန် ကျွန်ုပ်တို့လုပ်ဆောင်ပါသည်။ မြို့ပြပတ်ဝန်းကျင်ရှိ တောရိုင်းတိရစ္ဆာန်များအတွက် အထူးသဖြင့် တေးသီငှက်၊ စာကလေး၊ ငှက်ပိတုန်း၊ အသံသာငှက်မျိုးများကဲ့သို့သော ဒေသခံငှက်များအတွက် ဘေးအန္တရာယ်များရှိကြောင်း ကျွန်ုပ်တို့နားလည်သဖြင့် Gradient Canopy ကို ငှက်များအတွက်အဆင်ပြေသော နည်းဗျူဟာအမြောက်အမြားဖြင့် ဒီဇိုင်းရေးဆွဲထားခြင်းဖြစ်သည်။

အဆောက်အအုံများ၏ ဖန်သားပြင်သည် ငှက်တို့အပေါ် ပြင်းထန်သော သက်ရောက်မှုရှိနိုင်သောကြောင့် LEED ဒီဇိုင်းဆန်းသစ်တီထွင်မှု ခရက်ဒစ်- အဆောက်အအုံနှင့် ငှက်တိုက်မိမှု အနည်းဆုံးဖြစ်စေရန် ငှက်တိုက်မိမှု အဟန့်အတားနှင့် ဆီလျော်အောင် Gradient Canopy ရှိ အဆောက်အအုံ၊ တောတောင်ရေမြေနှင့် မီးတပ်ဆင်မှုများကို ဒီဇိုင်းရေးဆွဲရန် အရေးကြီးပါသည်။

ငှက်ဘေးကင်းသော ဒီဇိုင်းအစိတ်အပိုင်းများ ပေါင်းစပ်ထည့်သွင်းမည့် အကောင်းဆုံးနည်းလမ်းကို နားလည်ရန်အတွက် ကျွန်ုပ်တို့သည် ငှက်ဘေးကင်းသော အဆောက်အအုံများအတွက် ရှေ့ဆောင် စံနှုန်းနှင့် အကြံပြုချက်များ ကို လိုက်နာရန် ဂေဟဗေဒဆိုင်ရာ အတိုင်ပင်ခံများဖြစ်သော H.T. Harvey & Associates နှင့်အတူ ဆောင်ရွက်ပါသည်။ ကျွန်ုပ်တို့သည် Gradient Canopy တွင် အဓိကနည်းလမ်းနှစ်ခုဖြင့် ငှက်များအတွက်အဆင်ပြေသော ဒီဇိုင်းကို ပေါင်းစပ်ထည့်သွင်းခဲ့သည်- ပထမတစ်ခုမှာ အဆောက်အအုံ၏ဖန်သားပြင်တွင် အလင်းပြန်မှုနှင့် ကြည်လင်မှုကို လျှော့ချခြင်းဖြစ်ပြီး ဒုတိယတစ်ခုမှာ အတွင်းပိုင်းနှင့် အပြင်ပိုင်း အလင်းရောင်စနစ်များဖြင့် အဆောက်အအုံ၏ညအချိန် အလင်းရောင်ညစ်ညမ်းမှုကို လျှော့ချခြင်းတို့ဖြစ်သည်

ဖန်သားပြင်ကို ငှက်များရော လူများပါ မမြင်နိုင်သော်လည်း ပြတင်းပေါက်ဘောင်များနှင့် ရောင်ပြန်ဟပ်ခြင်းကဲ့သို့သော အမြင်အာရုံများမှတစ်ဆင့် ဖန်သားကို အချိန်ကြာလာသည်နှင့်အမျှ လူများက မြင်တတ်လာကြသည်။ သို့သော် ငှက်များတွင်မူ အတိမ်အနက်အမြင် အနည်းငယ်သာရှိပြီး တောတောင်ရေမြေနှင့် ကောင်းကင်၏ အလင်းပြန်မှုများကို တကယ့်အရာအဖြစ် မှတ်ယူလေ့ရှိသည်။ အဆောက်အအုံအတွင်း စိုက်ပျိုးပင်များ (သို့) ဖန်သားထောင့်များမှတဆင့် စိုက်ခင်းများကို ငှက်က မြင်သောအခါ ဖန်သားပြင်၏ကြည်လင်မှုသည် တိုက်မိခြင်းကိုလည်း ဖြစ်စေနိုင်သည်။ အခြေခံအားဖြင့် ကြည်လင်မှုဖြင့်ဖြစ်စေ ရောင်ပြန်ဟပ်မှုဖြင့်ဖြစ်စေ အဆောက်အအုံ၏ဖန်သားပြင်က စိုက်ခင်းများ (သို့) ကောင်းကင်ကို ပို၍မြင်နိုင်အောင်လုပ်လေ ငှက်တိုက်မိမှုဖြစ်ရပ် ပိုများလေဖြစ်သည်။

Gradient Canopy တွင် ကျွန်ုပ်တို့၏ဖြေရှင်းချက်သည် ဦးစွာ အလင်းပြန်မှုအညွှန်းကိန်း နည်းပါးသော ဖန်သားပြင်သုံးရန် ဖြစ်သည်။ အဆောက်အအုံ၏ ပြတင်းပေါက်များနှင့် မျက်နှာစာများစွာအတွက် ပိုမိုကောင်းမွန်သော မှန်ကို ပံ့ပိုးပေးသည့် ဖန်သားနည်းပညာနှင့် ထုတ်လုပ်မှုတွင် လတ်တလောတိုးတက်မှုများက နေရောင်ခြည်အပူရရှိမှုကို မထိခိုက်စေဘဲ အပြင်ပိုင်း အလင်းပြန်မှုနည်းပါးစေရန် ပိုမိုလွယ်ကူစေသည်။ အလှဒီဇိုင်းများကဲ့သို့သော ဖန်သားပြင်ပေါ်တွင် နီးကပ်စွာထည့်ထားသည့် မြင်ရသော အမှတ်အသားများအပါအဝင်၊ မြှုပ်ထည့်ထားသော ကြွေထည် “မှန်ကွက်” တို့ကြောင့် ငှက်များက အမှတ်အသားများကို အတားအဆီးအဖြစ် မှတ်ယူကြပြီး ဖြတ်သန်းရန် မကြိုးစားသောကြောင့်လည်း ငှက်သေဆုံးမှုကို သိသိသာသာလျှော့ချနိုင်သည်။ အသေးဆုံး ငှက်ပိတုန်းများအတွက်ပင် အကာအကွယ်ပိုမိုပေးနိုင်ရန် ရည်ရွယ်ပြီး ‘အမေရိကန်ငှက်ထိန်းသိမ်းစောင့်ရှောက်ရေး’ ၏ လက်ရှိလမ်းညွှန်ချက်အတိုင်း ထူသိပ်သောပုံသဏ္ဌာန် အမှတ်အသားများကို ရွေးချယ်ထားပါသည်။ Gradient Canopy တွင် အများမြင်ဘက်ခြမ်းများတွင် စကားလုံးပဟေဠိအဖြစ် မှန်အကွက် ဒီဇိုင်းပြုလုပ်ထားပြီး ၎င်းတွင် ဒေသခံငှက်အမျိုး ၃၀ ၏ အမည်များကို ဘာသာစကား ၃၀ နှင့်အတူ ဖန်သားပေါ်တွင် ပုံနှိပ်ထားသည်။ အလွန်လက်တွေ့အသုံးကျသော ငှက်ဘေးကင်းသည့် ဒီဇိုင်းအစိတ်အပိုင်းတွင် ပျော်စရာ၊ စူးစမ်းစရာထည့်ပေးသည့် “အီစတာ ကြက်ဥ” ပင်ဖြစ်ပါသည်။

နောက်ဆုံးတွင် Gradient Canopy ရှိ အလင်းပေးစနစ်ကို ငှက်တိုက်မိမှုများ လျှော့ချရန် အဓိကထားပြီး ဒီဇိုင်းရေးဆွဲထားသည်။ ညဘက်တွင် တောက်ပသောအလင်းရောင်သည် ငှက်များကို မျက်စိလည်စေကာ ဒေသတွင်းငှက်နေရပ်များကို အနှောင့်အယှက်ဖြစ်စေနိုင်သည်။ အထူးသဖြင့် ညဘက်တွင် ရွှေ့ပြောင်းနေထိုင်သည့် ငှက်မျိုးစိတ်များကို ထိခိုက်စေနိုင်သည်။ ကျွန်ုပ်တို့သည် ငှက်နေရပ်များသို့ အလင်းရောင်များ ပျံ့နှံ့မသွားစေရန်အတွက် အဆောက်အအုံ (သို့) ပတ်ဝန်းကျင်ရှိ အပင်များကို အလင်းပင့်မထွန်းခြင်း၊ အပြင်ဘက်မီးခုံများကို ကာရံခြင်းတို့ပြုလုပ်ပြီး Gradient Canopy တွင် အလင်းညစ်ညမ်းမှုကို လျှော့ချထားသည်။ ညအချိန်တွင်ပိတ်သွားသော ပြတင်းပေါက်အကာများကို တပ်ဆင်ထားပြီး တစ်စုံတစ်ဦးက အထဲတွင်အသုံးပြုနေမှသာ မီးပွင့်သွားကြောင်း သေချာစေရန် အတွင်းပိုင်းမီးအားလုံးတွင် ညအချိန် လူရှိနေကြောင်း အာရုံခံစနစ်များကို ထည့်ထားသည်။

Gradient Canopy ရှိ ကျွန်ုပ်တို့၏ ငှက်ဘေးကင်းသော ဒီဇိုင်းအစိတ်အပိုင်းများ ရည်ရွယ်ထားသည့်အတိုင်း အလုပ်လုပ်ကြောင်းသေချာစေရန်နှင့် လိုအပ်သလို ချိန်ညှိမှုများ ပြုလုပ်နိုင်စေရန် ကျွန်ုပ်တို့သည် ပုံမှန် အဆောက်အအုံပတ်ဝန်းကျင်တွင် လမ်းလျှောက်ခြင်း၊ လေ့လာကြည့်ရှုခြင်းတို့မှတစ်ဆင့် အဆောက်အအုံ၊ နေရာဖွဲ့စည်းပုံများနှင့် ငှက်တိုက်မိမှုများကို ခြေရာခံရန် သုံးနှစ်တာစောင့်ကြည့်ခြင်း အစီအစဉ်လည်း ချမှတ်ခဲ့ပါသည်။ အားလုံးထည့်သွင်းစဉ်းစားပြီး ငှက်ဘေးကင်းသော ဒီဇိုင်းကို ပေါင်းစပ်ထည့်သွင်းခြင်းက ကျွန်ုပ်တို့၏ အဆောက်အအုံများကို ၎င်းတို့၏ပတ်ဝန်းကျင်နှင့် ပိုမိုကောင်းမွန်စွာ ပေါင်းစည်းနိုင်စေကာ တောရိုင်းတိရစ္ဆာန်နှင့် လူများ ကောင်းမွန်သောနည်းလမ်းနှင့် အတူယှဉ်တွဲနေထိုင်နိုင်စွမ်းကို တိုးမြှင့်ပေးမည်ဟု မျှော်လင့်ပါသည်။