நகர்ப்புறச் சூழ்மண்டலம்

வளாகத்தைச் சுற்றுச்சூழல் நிறைந்த சூழல்களுடன் உருவாக்குவது பூமிக்கு மட்டுமல்லாமல் மக்களுக்கும் நன்மை தரக்கூடியதாக இருக்கும். ஆரோக்கியமான, பன்முகத்தன்மை கொண்ட சுற்றுச்சூழல்களும் நிலப்பரப்புகளும் உயிரினப்பன்முகத் தன்மையை ஆதரிக்கின்றன, சூழலின் மீள் திறனை அதிகரிக்கின்றன, மேலும் மனித ஆரோக்கியத்திற்கு முக்கிய நன்மைகளைத் தருகின்றன. இதன் காரணமாகவே உள்ளூர் சூழ்மண்டலங்களை உயிரினப்பன்முகத் தன்மையுடன் மீண்டும் உருவாக்குவதை மையமாக வைத்து எங்கள் Gradient Canopyயை வடிவமைத்துள்ளோம்.

Gradient Canopyயில் தாவரங்களுக்கான நான்கு ஏக்கர் இடத்தில், முன்னதாக சிலிகான் பள்ளத்தாக்கில் பரவலாகக் காணப்பட்ட தாவர வகைகளைக்கொண்டு சூழ்மண்டலத்தை மீண்டும் உருவாக்குவதற்கு நாங்கள் பணியாற்றினோம். இதில் கருவாலி மரங்கள், வில்லோ தோப்புகள், சப்பரல், புல்வெளிகள் ஆகியவை அடங்கும். இந்த நிலப்பரப்பு கிட்டத்தட்ட முற்றிலும் பூர்வீகத் தாவர இனங்களைக் கொண்டுள்ளது, இதில் தோராயமாக 400 பூர்வீக மரங்கள் மற்றும் மகரந்தச் சேர்க்கைக்கு உகந்த பூர்வீகச் செடிகளான மில்க்வீட், யார்ரோ, சேஜ் போன்றவை அடங்கும். உயிரினங்களுக்கான பல்லுயிர் மண்டலத்தை அமைக்க சிறந்த முறையில் பயனுள்ள நிலப்பரப்புகளை உருவாக்கும் அதே வேளையில், இப்பகுதியின் பாரம்பரியச் சுற்றுச்சூழலுக்குப் புத்துயிர் அளித்து மக்கள் வாழ்வை மேம்படுத்துவதே எங்கள் நோக்கமாகும்.

Gradient Canopyயில் எங்கள் சூழலியல் உத்தியில் ஒரு குறிப்பிட்ட வகையான மரங்களே பிரதானமாக அமைந்துள்ளன, அவை கருவாலி மரங்கள். கலிஃபோர்னியா நிலப்பரப்பின் அடையாளச் சின்னமாக விளங்கும் கருவாலி மரங்கள் ஒருகாலத்தில் சிலிக்கான் பள்ளத்தாக்குப் பகுதிகளில் பரவலாகக் காணப்பட்டன. பூர்வீகக் கருவாலி மரங்கள் வறட்சியைத் தாங்கும், நெருப்பால் பாதிக்கப்படாது, காற்று மாசுபாட்டை அகற்றும் மற்றும் வளிமண்டலத்திலிருந்து கார்பனை உறிஞ்சும் திறன் கொண்டவை. கூடுதலாக, கருவாலிக் காடுகள் உள்ள சூழ்மண்டலங்கள் கலிஃபோர்னியாவில் மிக உயர்ந்த தாவர மற்றும் விலங்குப் பன்முகத்தன்மையை நிலைநிறுத்துகின்றன, இவை 2,000க்கும் அதிகமான தாவர இனங்களையும் 5,000 பூச்சி இனங்களையும் ஆதரிக்கின்றன. நூற்றுக்கணக்கான பறவைகள், பாலூட்டிகள் மற்றும் பிற வனவிலங்குகள் உணவு, நிழல் மற்றும் தங்குமிடத்திற்காகக் கருவாலி மரக் காடுகளின் செழுமையை நம்பியுள்ளன.

கருவாலி மரங்கள் உட்பட பாக்காய், சிக்கமோர், வில்லோ போன்ற பிற பூர்வீக மர இனங்களைக் கொண்ட நிலப்பரப்பில் மர நிழற்பரப்பை இணைக்கும் விதத்தில் வடிவமைப்பதற்காக உள்ளூர் விஞ்ஞானிகளுடன் இணைந்து நாங்கள் பணியாற்றினோம். இதுபோன்ற தொடர்ச்சியான மர நிழற்பரப்புகள், செயற்கைச் சுற்றுச்சூழல் வழியாக வனவிலங்குகள் நடமாடும் பாதைகளை உருவாக்குவதோடு நகர்புறப் பகுதிகளில் வெப்பநிலை அதிகரிப்பதையும் குறைக்கிறது.

மகரந்தச் சேர்க்கைக்கு உகந்த பூர்வீகச் செடிகள் Gradient Canopyயின் பூர்வீக மரங்களுக்கு அடித்தளமாக அமைவதோடு உள்ளூர் பட்டாம்பூச்சிகள், பறவைகள் மற்றும் தேனீக்களுக்குத் தேவைப்படும் வளங்களையும் வழங்குகின்றன. நிலப்பரப்பின் ஒரு பகுதி, குறிப்பாக வட அமெரிக்காவின் மேற்கத்திய மொனார்க் பட்டாம்பூச்சிகளை ஆதரிப்பதற்காகவே வடிவமைக்கப்பட்டுள்ளது. கிடைக்கக்கூடிய சிறந்த அறிவியல் தகவல்களைப் பயன்படுத்தி மில்க்வீட் செடிகளின் சரியான கலவையை உருவாக்குகிறோம். இந்தச் செடிகள் மொனார்க் பட்டாம்பூச்சிகளின் முட்டைகள் மற்றும் கம்பளிப் புழுக்களுக்குப் பயன்படுகின்றன. மேலும் அவற்றின் பூக்கள் பட்டாம்பூச்சிகளின் நீண்டதூர இடம்பெயர்தலுக்கு உதவும் உணவை வழங்குகின்றன.

Gradient Canopyயில் மகரந்தச் சேர்க்கைக்கு உகந்த பூர்வீகச் செடிகளுடன், பயிரிடப்பட்ட தோட்டப் படுக்கைகளையும் தேனீக்களுக்கான பெட்டிகளையும் வைத்துள்ளோம். இது உள்ளூரில் விளைந்த ஃபிரஷ் உணவுகள் சமூகத்தினருக்குக் கிடைப்பதை நோக்கமாகக் கொண்ட லிவிங் பில்டிங் சேலஞ்சின் நகர்ப்புற வேளாண்மையின் பிரதான இலக்கை அடைய உதவுகிறது. இரண்டு தோட்டப் படுக்கைகளும் எங்கள் கஃபேக்களுக்கும் Googler பயிற்சி சமையலறைகளுக்கும் உணவை உற்பத்தி செய்வதோடு, உள்ளூர் சூழலுக்கேற்ப இயற்கை நிலங்களில் பயிரிடுவதையும் அதைப் பராமரிப்பதையும் இணைந்து செய்வதன் மூலம் மீள் திறனுடன் கூடிய உள்ளூர் உணவு உற்பத்தியில் கூடுதல் மாற்றத்தை ஏற்படுத்தலாம் என்பதை விளக்கிக் காட்டுகின்றன.

மவுண்டைன் வியூவில் உள்ள Googleளின் தேன்கூடுகளை நிர்வகிக்கும் The Planet Bee Foundation என்ற லாப நோக்கமற்ற நிறுவனத்துடனும் நாங்கள் இணைந்து பணிபுரிகிறோம். அவர்களின் உதவியோடே இங்கே தேனீக்களுக்கு மூன்று பெட்டிகளை வைத்துள்ளோம். எங்கள் வடிவமைப்புச் செயல்முறையின் ஒரு பகுதியாக, பூர்வீகம் மற்றும் பூர்வீகம் அல்லாத தேனீக்கள் இரண்டுக்கும் பலனளிக்கும் வகையில் நிலப்பரப்பை அமைப்பது எப்படி என்பதை நாங்கள் கற்றுக்கொண்டோம். எதிர்காலத்தில், பூர்வீக உயிரினப்பன்முகத் தன்மை, உள்ளூர் உணவு உற்பத்தி ஆகிய இரண்டிற்கும் பயனளிக்கும் விதமாக பூர்வீகம் அல்லாத தேனீக்களைப் பூர்வீகச் சுற்றுச்சூழல் வடிவமைப்புடன் Google எப்படி ஒருங்கிணைக்கிறது என்பதை இந்த ஆய்வு தெரிவிக்கும்.

Gradient Canopyயின் நகர்ப்புறச் சுற்றுச்சூழல் வடிவமைப்பு Googleளின் சூழலியல் திட்டத்தால் வழிநடத்தப்படுகிறது. கிடைக்கக்கூடிய சிறந்த அறிவியல் தகவல்களைப் பயன்படுத்தி எங்கள் வெளிப்புற இடங்களின் வடிவத்தைக் கட்டமைக்க, 2014ம் ஆண்டு நாங்கள் இதைத் தொடங்கினோம். இறுதியாக, எங்கள் வளாகங்கள் மூலம் இயற்கை மற்றும் உயிரினப்பன்முகத் தன்மையை மேம்படுத்துவதற்கான எங்கள் மாபெரும் தொலைநோக்குப் பார்வையின் ஒரு முக்கிய அங்கமாக Gradient Canopy உள்ளது.