வாகன நிறுத்துமிடத்திலிருந்து மக்கள் கூடும் இடமாக மாறுகிறது

பொதுவாக, பார்க்கிங் கேரேஜ்களின் கட்டுமானத்தில் பெரிய அளவில் புதுமைகள் இருக்காது. நினைத்த இடத்திற்குச் சென்றடைய கார்களைச் சார்ந்துள்ள பெரும்பாலானோரின் தேவையை அது நிறைவுசெய்கிறது. ஆனால் கார்பன் உமிழ்வையும் போக்குவரத்து நெரிசலையும் குறைக்கும் வகையில், குறைவான கார்களும் சூழலுக்கு மேலும் பாதுகாப்பான போக்குவரத்து முறைகளும் உள்ள சாத்தியமான எதிர்காலத்தை நோக்கி நாம் நகரும்போது, பார்க்கிங் இடங்களுக்கான தேவைகள் குறைந்துவிடும். அதனால், ஒற்றை நோக்கத்திற்காக வடிவமைக்கப்படும் பார்க்கிங் கேரேஜ்கள் பொருத்தமற்றவையாக மாறிவிடும். மேலும் அவை தகர்க்கப்படலாம். இது கழிவு, கார்பன் மற்றும் செலவை அதிகரிக்கும். எனவே, Mountain Viewவில் உள்ள Googleளின் புதிய Alta Garage எதிர்காலத்தில் பார்க்கிங் கேரேஜாக மட்டுமே எஞ்சுவதில் இருந்து தடுக்கும் வகையில் வடிவமைக்கப்பட்டுள்ளது. உரிய தருணம் வரும்போது தொழில்ரீதியான, வீட்டு அல்லது சமூகப் பயன்பாட்டிற்கேற்ப அதை எளிதாக மாற்றிக்கொள்ளலாம்.

இந்த யோசனைக்கு எதிர்காலத்தைக் கருத்தில்கொள்ளும் பார்க்கிங் என்று பெயர்: சமூகத்தின் தேவைகள் எதிர்காலத்தில் மாறும்போது Alta Garage பயன்பாடும் மாறலாம். அலுவலகங்கள், வீடு, வசதிகள் அல்லது நிகழ்வுக்கான இடங்கள் கூடுதலாகத் தேவையா? பார்க்கிங்கிற்கான தேவைகள் குறையும்போது Alta Garage இவற்றில் எதுவாக வேண்டுமானாலும் மாறலாம். அதுவும், செலவைக் குறைத்து, நேரத்தை மிச்சப்படுத்தி, கழிவுகளைக் குறைத்து சூழலுக்குப் பாதுகாப்பான வழிமுறையில் இதைச் செய்ய முடியும்.

நாங்கள் நீண்ட காலமாகவே சூழலுக்குப் பாதுகாப்பான போக்குவரத்துத் தீர்வுகளில் முதலீடு செய்வதில் உறுதியாக இருந்து வருகிறோம். அதில் சுற்றுச்சூழலுக்கு உகந்த விருப்பங்களைத் தேர்ந்தெடுக்க மக்களுக்கு உதவும் கார்பூல் திட்டங்களும் தானாகச் செல்லும் வாகனங்களும் தொழில்நுட்பங்களும் அடங்கும். எதிர்காலத்தைக் கருத்தில்கொள்ளும் அதன் இந்த இலக்குகளின்படியே Alta Garage வடிவமைக்கப்பட்டுள்ளது. சூழலுக்குப் பாதுகாப்பான பயண விருப்பங்களை ஊக்குவிக்கும், குறைவான கார்கள் மட்டுமே இருக்கும் சுற்றுப்புறமாக இந்தப் பகுதியை மாற்றும் Mountain View நகரின் இலக்கை இது ஆதரிக்கிறது.

ஆனால் தற்போது செயல்படக்கூடிய, ஆனால் அதே சமயம் எதிர்காலத்தில் பரந்த சாத்தியங்கள் கொண்ட பயன்பாடுகளுக்கு மாற்றும் வகையில் எப்படி ஒரு கேரேஜை வடிவமைப்பது? 2018ல் Googleளின் ரியல் எஸ்டேட் R&D Lab குழு இந்தக் கேள்வி பற்றி கலந்தாலோசிக்கத் தொடங்கியது. Googleளின் நிறுவனர்கள், ஒருவர் மட்டும் ஓட்டும் கார்களில் இருந்து தங்கள் பார்வையை விலக்கும்போது அதன் ஒரு பகுதியாக இந்த எண்ணம் தோன்றியது. அதற்குப் பதிலாக அவர்கள் பஸ்கள், சைக்கிள் மற்றும் தானாகச் செல்லக்கூடிய வாகனங்கள் (AVகள்) போன்ற குறைவான உமிழ்வு கொண்ட போக்குவரத்து வகைகளில் கவனம் செலுத்தத் தொடங்கினார்கள்.

“எதிர்காலத்தில் நிலைத்திருக்கும் வகையில் நமது உருவாக்கங்கள் இருக்க வேண்டும்” என்று செயற்கை சுற்றுச்சூழலுக்கான Googleளின் R+D Lab இயக்குநர் மிச்செல் காஃப்மன் கூறுகிறார். "நாங்கள் பல்வேறு கட்டுமான நுட்பங்கள், பொருட்கள், அளவுகள் மற்றும் உத்திகளை லேபில் ஆராய்ச்சி செய்து, குறைவான செலவில் சூழலுக்கேற்ப எளிதாக மாறக்கூடிய கட்டடத்தை உருவாக்குவதற்கான முன் தேவைகளைக் கண்டறிந்தோம்".

நெகிழ்வான, மாறத்தக்க அடிப்படைக் கட்டடத்தை (கோர் அண்ட் ஷெல் பில்டிங்) கட்டுவது முக்கியமானதாக இருந்தது. எனவே எதிர்காலத்தில் தேவைப்பட்டால் கேரேஜுக்கு இரண்டாம் வாழ்க்கை கிடைக்கும். தற்போதைய உள்ளமைவில், கேரேஜில் 1,700க்கும் மேற்பட்ட கார்களை நிறுத்தலாம். அதோடு அங்கு 450க்கும் மேற்பட்ட மின்சாரக் கார் சார்ஜிங் நிலையங்களை அமைக்கலாம். மேலும் அது Google பணியாளர்களுடன் சேர்த்து Google Visitor Experienceஸுக்கு வருபவர்களின் வாகனங்களையும் நிறுத்த உதவுகிறது. ஆனால் இந்தப் பார்க்கிங் ரேம்ப்களை மாடிகளாகவும் உட்புறப் படிகளாகவும் மாற்றுவதன் மூலம், இவற்றின் தனித்தனியான பகுதிகளை ஒரு நாளில் வசதிகள், அலுவலகம் அல்லது வீட்டுக்கான இடங்களாக மாற்றுவதற்கான சாத்தியங்கள் உள்ளன. மாற்றத்தை எளிதாக்குவதை உறுதிசெய்ய, எதிர்காலச் சூழல்களில் பகல் வெளிச்சம் இங்கு எப்படிச் செயலாற்றும் என்று ஆராய்ந்துள்ளோம். தரையின் உயரமும் ரேம்ப் அகற்றப்படுவதும் அதிகமான வெளிச்சம் அங்கே கிடைப்பதற்கு உதவும். இந்த மாற்றத்தை எளிதாக்குவதற்கு நாங்கள் Clark Pacific, Gensler, Hollins, International Parking Design, Ellis Partners, SPMD Design மற்றும் பிற கூட்டாளர்களுடன் இணைந்து பணியாற்றி பல்வேறு வடிவமைப்புக் கூறுகளைச் சேர்த்து இதை வழக்கமான பார்க்கிங் கேரேஜில் இருந்து பிரத்தியேகமானதாக மாற்றியுள்ளோம்.

“ஓர் உதாரணத்தைக் கூற வேண்டுமென்றால், இந்தக் கேரேஜில் தரைத் தட்டுகள் மிகப் பெரியதாகவும், மேற்கூரைகள் மிக உயரமாகவும் உள்ளன. இது ஓர் அலுவலக அல்லது சில்லறை விற்பனைக் கடையின் அளவுகளை ஒத்ததாக இருக்கிறது” என்று Googleளில் கட்டுமான இயக்குநராக உள்ள ஜெஃப்ரீ கரி கூறியுள்ளார். “மேல் தளங்களுக்குச் சென்றுவர கார்கள் பயன்படுத்தும் இந்த ரேம்ப்களை அகற்ற முடியும். அவற்றை அகற்றி அறைகள், முற்றங்கள் அல்லது மாடிகளை உருவாக்கலாம். இதன்மூலம் எதிர்காலத்தில் உட்புறப் பகுதிகளில் அதிக அளவிலான வெளிச்சம் கிடைக்கும்.

கூடுதலாக, வடிகால்களுக்காக சாய்வாக்கப்படாத சமதளத் தரைகள் தளங்களில் உள்ளதால், கேரேஜை வேறொன்றாக மாற்றுவது எளிதாகும். முன்பே உறுதிசெய்யப்பட்ட கான்கிரீட் அதிகமான கட்டுமான எடையைத் தாங்கும் வகையில் பலப்படுத்தப்பட்டுள்ளது. ஒரு வழக்கமான வணிகப் பயன்பாடு அல்லது குடியிருப்புக் கட்டடத்தின் தரத்தில் இது உருவாக்கப்பட்டுள்ளது. திரைச்சுவரை நிறுவுவதையும் இது எளிதாக்குகிறது. எனவே மாற்றப்பட்ட கட்டடத்தை வெவ்வேறு பகுதிகளாகப் பிரிக்கலாம். எதிர்காலத்தில் பிளம்பிங் மற்றும் மின்சார லைன்களை அமைப்பதற்கும் இந்தக் கட்டுமானப் பிளாக்குகள் உதவும்.

போதுமான அளவு நெகிழ்வுத்தன்மையுடன் வடிவமைத்து, எதிர்காலத்தில் Alta Garageஜை பாதி கேரேஜ், பாதி அலுவலகம் அல்லது மொத்தமாக வேறு பயன்பாட்டிற்கு மாற்றும் வகையில் உருவாக்குவதே எங்கள் திட்டமாகும். கட்டடக் கலைஞர்களைப் பொறுத்தவரை, எதிர்காலத்தைக் கருத்தில்கொள்வது என்றால் அவர்கள் வடிவமைத்த கேரேஜை ரிவர்ஸ் இன்ஜினியரிங் செய்வதே ஆகும். எதிர்கால அலுவலகத்தில் படிகளும் லிஃப்ட்களும் எங்கே இருக்கும்? அபார்ட்மெண்ட் கட்டடத்திற்குத் தேவைப்படும் பிளம்பிங், ஹீட்டிங் மற்றும் கூலிங் சிஸ்டங்களுக்கு எங்கே இடம் இருக்கும்? “அபார்ட்மெண்ட் மற்றும் அலுவலகத்திற்கான ஃப்ளோர் பிளான்களைப் பிரித்து, அதிலிருந்து வடிவமைப்பைத் தொடங்கி பார்க்கிங் இடத்துடன் ஒத்துப்போகும் சிலவற்றை மேலே அடுக்குவதை நாங்கள் முதல் நாளே தொடங்கிவிட்டோம்” என்று காஃப்மன் கூறுகிறார்.

ஆனால் Alta Garageஐத் தனித்துவமாக்குவது அதன் உட்புற நுட்பங்கள் மட்டும் இல்லை. வெளிப்புறத்திலும் ஒரு வழக்கமான பார்க்கிங் கேரேஜ் போல Alta Garage இருக்காது. கலிஃபோர்னியாவின் கலைஞர் கிம் வெஸ்ட் வடிவமைத்து, SPMDesign ஆய்வு செய்த Ode to Bohemia No. 5 (எல்லையற்ற மலர்ச்சி) எனும் மாறும் திறனுள்ள கலைநயமான முகப்பு, செடிகள் படர்ந்த உள்ளூர் நிலக்காட்சியை உத்வேகமாகக் கொண்டது. அதில் நாள் முழுவதும் வெவ்வேறு வண்ணங்களை வெளிப்படுத்தும் 97,500 வண்ணமயமான உலோக பாகங்கள் உள்ளன. மனித அனுபவத்தை மேம்படுத்த, இந்தக் கலைப்பொருள் வண்ணம், வர்ணஜாலம் மற்றும் படைப்பூக்கத்தைக் கூட்டுகிறது. கட்டடத்தைப் போலவே, இதுவும் எதிர்காலத்தில் மாற்றுவதற்கேற்ப வடிவமைக்கப்பட்டுள்ளது. எதிர்காலத்தில் தேவைப்படும்போது, இந்த மாறும் திறனுள்ள பாகங்களைத் தனித்தனியே பிரித்து வெவ்வேறு இடங்களுக்குக் கொண்டுசெல்ல முடியும்.

முழுநேரப் பார்க்கிங் கட்டடமாக Alta Garage எதிர்காலத்தில் இருக்காது என்றாலும், தரைத்தளம் தொடர்ந்து AVகளுக்கான சார்ஜிங் மற்றும் பிக்கப் நிலையமாகத் தொடர்ந்து செயல்பட முடியும். கூரையில் ஒலிமின்னழுத்தப் பேனல்கள் உள்ளன. இது கட்டடத்தின் ஆற்றலை உருவாக்க உதவுகிறது. மேலும் எதிர்காலத்தில் டெலிவரி ட்ரோன்கள், பறக்கும் கார்கள் அல்லது AVகளுக்கான மேற்தளப் பார்க்கிங்காகவும் அதை மாற்ற முடியும்.

எதிர்காலத்தில் Alta Garage செயல்பாடுகள் எதுவாக இருந்தாலும், அது எதிர்காலத்தை மனதில் வைத்தே இப்போது திட்டமிடப்பட்டுள்ளது.