Од паркинг до луѓе

Вообичаено, гаражите за паркирање не се архитектонски револуционерни – тие имаат функционална цел во општество во кое многумина сѐ уште се потпираат на автомобилите за да стигнат до својата дестинација. Но, додека се стремиме кон можна иднина со помалку автомобили и поодржливи начини на транспорт, што ќе помогне да се намалат емисиите на јаглерод и сообраќајниот метеж, потребата за паркинг најверојатно ќе се намали. За возврат, гаражите за еднократна употреба може да станат ирелевантни и да бидат уништени, што ќе доведе до зголемен отпад, јаглерод и трошоци. Затоа, новата Alta Garage на Google во Маунтин Вју беше дизјанирана со можност да не биде паркинг гаража во иднина – подготвена е за во кој било момент да биде претворена во објект за комерцијална или станбена употреба или пак за целите на заедницата.

Оваа идеја се нарекува „незастарливо паркирање“: како што се менуваат потребите на општеството така може да се промени и Alta Garage. Потребни ви се повеќе канцеларии, живеалишта, погодности или простор за настани? Како што се намалува потребата за паркинг, Alta Garage може да се претвори во сето тоа. Може да го направи тоа на начин што ги намалува трошоците, штеди време, го намалува отпадот и ја зголемува одржливоста.

Веќе долго време сме посветени на вложување во одржливи решенија за транспорт, вклучувајќи програми за заеднички превоз, автономни возила и технологија која им помага на луѓето да донесуваат одлуки погодни за средината. Alta Garage ги промовира овие цели со својот незастарлив дизајн, а тоа исто така ја поддржува визијата на градот Маунтин Вју за оваа област да биде соседство со малку автомобили, кое промовира одржливи опции за патување на работа.

Но, како се дизајнира гаража која е функционална сега, а која може да се прилагоди за разни можни идни употреби? Во 2018 г., тимот на лабораторијата за истражување и развој за недвижности на Google почна да размислува за истово прашање. Ова беше поттикнато од желбата на основачите на Google да се оддалечат од проектите со автомобили со еден возач и наместо тоа да ги нагласат начините на транспорт со помала емисија на штетни гасови, како што се автобусите, велосипедите и автономните возила (AV).

„Сакаме да изградиме нешто што е подготвено за што и да носи иднината“, вели Michelle Kaufmann, директор на тимот на лабораторијата за истражување и развој на Google за изградената средина. „Истражувавме разни градежни техники, материјали, големини и стратегии во лабораторијата за да ги идентификуваме предусловите за да добиеме приспособлива структура притоа минимизирајќи ги трошоците.“

Клучот беше да се изгради флексибилна и приспособлива основа за градење, со цел гаражата еден ден да може да добие втора шанса за живот, доколку е потребно. Со моменталната конфигурација, гаражата собира над 1.700 автомобили, како и над 450 станици за полнење електрични возила и нуди паркинг и за вработените во Google и за посетителите на Google Visitor Experience. Но, со претворање на рампите за паркирање во тераси и внатрешни скали, индивидуалните нивоа еден ден може да станат простор за погодности, канцеларии или живеалишта. За да обезбедиме лесна конверзија, извршивме и студии за дневна светлина за идните услови за да бидеме сигурни дека висината на подот и отстранувањето на рампите ќе резултираат со максимална дневна светлина. За да ја олесниме оваа трансформација, соработувавме со Clark Pacific, Gensler, Hollins, International Parking Design, Ellis Partners, SPMDesign и други партнери за да се интегрираат неколку други елементи што ја издвојуваат од стандардните гаражи за паркинг.

„На пример, гаражата има огромни подни плочи и екстремно високи тавани, кои се посоодветни за канцелариски простори или простори за трговија на мало“, вели Jeffrey Curry, директор за конструкција во Google. „Рампите што ги користат автомобилите за да се движат низ нивоата се демонтираат и може да се отстранат за да се направи простор за атриуми, дворови или тераси што ќе овозможат дневна светлина да ги исполни идните внатрешни простори.“

Дополнително, користењето рамни подови со дренажа ги елиминираше косините на подовите, што би ја олеснило секоја конверзија во објект што не е гаража. Готовиот бетон е зајакнат за да се справи со поголем структурен товар, во согласност со она што е типично за комерцијална или станбена зграда. Ова овозможува и поставување на одбранбен ѕид, така што претворената зграда може да се подели на различни делови. Структурните празнини ќе го олеснат насочувањето на идните електрични и водоводни цевководи.

Целта е да се овозможи доволно флексибилност за во иднина Alta Garage да може да биде половина гаража, половина канцеларија, или пак да се претвори во објект за целосно различна цел. За архитектите, незастарливоста всушност значеше обратен инженеринг на дизајнот на зградата. Ако во иднина просторот стане канцелариски, каде би се наоѓале скалите и окната за лифт? Каде би можело да има простор за водовод и системи за греење и ладење, кои би биле потребни за една станбена зграда? „На првиот ден, моравме да поставиме планови на катови за сместување и канцеларии и да работиме наназад за да ги најдеме заедничките карактеристики што би можеле да се преклопат со паркирањето“, вели Kaufmann.

Но, Alta Garage не е уникатна само поради внатрешните детали; дури и однадвор не изгледа на типична гаража за паркинг. Дизајнирана од Kim West, уметничка од Калифорнија, со избирање и развој и дизајн од SPMDesign, кинетичката уметничка фасада наречена Ode to Bohemia No. 5 (Inexhaustible Blooms) е инспирирана од локалниот растителен пејзаж и се состои од 97.500 метални парчиња во боја, кои одразуваат различни тонови во текот на денот. Делото додава боја, енергичност и креативност за подобрување на човековото доживување. Исто како и зградата, делото е дизајнирано да биде незастарливо – кинетичките парчиња може да се расклопат и да се преместат на друга локација во иднина, ако тоа е потребно.

Дури и ако еден ден Alta Garage веќе не е простор наменет само за паркинг, приземјето и натаму може да служи како станица за полнење и земање автономни возила. Покривот има соларни фотоволтаични панели за да помогне во генерирањето струја на зградата, а во иднина може да биде достапен паркинг на покривот за работи како што се беспилотни летала за испорака, летечки автомобили или автономни возила.

Без разлика за која цел ќе се користи Alta Garage во иднина, дизајнирана е во сегашноста, земајќи ја предвид иднината.