Innanhússgarðar

Frá stofnun Google höfum við trúað því af öllu hjarta að velgengni fyrirtækisins hvíli í höndum starfsmanna okkar. Þess vegna höfum við lagt ríka áherslu á að hanna rými okkar með ánægju og vellíðan starfsmanna Google í huga. Í Gradient Canopy nær þessi notendamiðaða hugmyndafræði til einnar af grundvallarhugmyndum okkar við skipulagningu innanrýmisins: að skipta byggingunni aðeins í tvær hæðir. Skrifborðsaðstaða og samvinnurými eru staðsett á efri hæðinni ásamt innanhússgörðum sem tengja þau við rýmin á neðri hæðinni þar sem má finna fundarherbergi, innanhússgarða og rými þar sem öll teymi geta komið saman.

Vinnurýmin á annarri hæð voru hönnuð með sjálfbærni, sveigjanleika og getu til að einbeita sér í huga. Öll efri hæðin samanstendur af forsmíðuðum herbergjum, veggjum og húsgögnum á hjólum. Það stuðlar að sveigjanleika þar sem hægt er að breyta rýmunum með einföldum hætti án sóunar í ljósi þess að hægt er að endurnýta öll efni í nýjar innréttingar. Hæðin býður einnig upp á stórt rými fyrir þá sem þurfa að einbeita sér á meðan neðri hæðin býður upp á samvinnurými þar sem hægt er að taka sér andlega og líkamlega pásu yfir daginn.

Innanhússgarðarnir á fyrstu hæð Gradient Canopy stuðla að samveru og sjá til þess að allir hafi aðgang að heilnæmu umhverfi sem hvetur til afkasta. Á hefðbundnum skrifstofum er oft að finna ýmsa aðstöðu og fyrirkomulag í bland við skrifborðsrými. Alls 20 innanhússgarðar með opnun stigum tengja hæðirnar tvær og tryggja greiðan aðgang að aðstöðu á sama tíma og þeir eru svæði með margþætt notagildi sem teymi geta nýtt sér í fjölbreyttum og sveigjanlegum tilgangi.

Auk þess að aðgreina einbeitingarsvæði frá svæðum þar sem umgangur er mikill til að auðvelda fólki að sinna starfi sínu með besta móti hafa innanhússgarðarnir einnig jákvæð áhrif sökum nálægðar við náttúruna og gera starfsmönnum Google kleift að hlaða batteríin yfir daginn. Við vitum að góð hönnun endurspeglar djúpstæð tengsl milli náttúru og heilsu manna og því innleiddum við nálægð við náttúruna í hönnun Gradient Canopy til að skapa rými sem gerir fólki kleift að blómstra. Hönnun sem byggist á nálægð við náttúruna býður upp á fjölbreytt rými sem stuðla að margþættu skynáreiti í líkingu við það sem maður upplifir úti í náttúrunni. Innanhússgarðarnir eiga þátt í að ýta undir lífeðlisfræðilega kosti hreyfingar, sem geta í kjölfarið örvað huga fólks og vakið sköpunargleði þegar fólk ferðast á milli hæða yfir daginn. Þeir hleypa einnig dagsbirtu inn í gegnum glugga neðri hæðarinnar sem staðsettir eru í ljóshæð, sem hjálpar til við að viðhalda heilbrigðri dægursveiflu.

Hönnun innanhússgarðanna tengist einnig Gradient Canopy í stærra samhengi og stuðlar að tengingu fólks og staðar. Hver innanhússgarður sækir innblástur í eitt af fjórum lífbeltum í umhverfi okkar eða kjörlendi heimilis okkar á Flóasvæðinu: hafið, flóann, fjallsræturnar og strandrisafuru. Lífbeltin þjóna einnig tilgangi leiðarvísis þar sem byggingunni er skipt upp í fjóra hluta sem hver og einn tengist tilteknu lífbelti.

Litir, list, húsgögn og áferð í hverjum innanhússgarði ráðast af þema lífbeltisins. Margir þessara þátta eru tilraunakenndir og umlykjandi, sem er hluti af viðleitni okkar til að skapa rými í sameiningu og veita starfsfólki möguleika á að upplifa skemmtileg og óvænt augnablik yfir daginn. Í hafbeltinu sækir til dæmis innanhússgarðurinn „Buoy Bay“ innblástur í hreyfingu ljóss sem endurkastast af yfirborði hafsins. Í strandrisafurubeltinu er gólf innanhússgarðsins „Clover Camp“ skreytt súrsmærum sem vísa til smárabreiðunnar sem blómstrar í jarðvegi skógarins. Við unnum með listamönnum af svæðinu við gerð margra innanhússgarðanna til að skapa staðbundnar innsetningar sem ýta undir sköpun, forvitni og innblástur.

Þegar öllu er á botninn hvolft þjóna innanhússgarðarnir margvíslegum tilgangi í daglegu starfi starfsmanna Google. Auk þess að hvetja til hreyfingar og bjóða upp á margþætta skynupplifun þjóna þeir tilgangi leiðarvísis og auðvelda fólki að ná áttum innan byggingarinnar á skemmtilegan hátt sem ætlað er að vekja innblástur. Að lokum, í ljósi þess að hönnunin byggist á þáttum úr náttúrunni, tengja innanhússgarðarnir bygginguna við samhengi hennar og minna okkur á djúpstæð tengsl okkar við náttúruna, jafnvel þótt við séum innandyra.