Vistvæn efni

Í áratugi höfum við kannað hvernig best er að fara að því að hanna sem heilbrigðast innanrými. Við höfum lengi lagt ríka áherslu á að skapa heilsusamleg vinnurými, allt frá því þegar stofnendur Google gengu um fyrstu byggingar okkar til að mæla loftgæði innandyra með agnaskynjara í lófanum, til prófana á þúsundum vara í gegnum árin til að tryggja að við stuðlum ekki að losun óþarfa eiturefna í uppgerðum rýmum okkar. Við erum stolt af því að Gradient Canopy er eitt af stærstu verkefnum sem hafa hlotið vottunina „International Living Future Institute (ILFI) Living Building Challenge (LBC) Materials Petal“, sem miðar að því að koma á gagnsæju hagkerfi skaðlausra og vistvænna efna.

Við byggingu Gradient Canopy og Google Visitor Experience forgangsröðuðum við efnum sem eru heilsusamleg fyrir bæði fólk og umhverfið. Hvert einasta efni sem fór í bygginguna var yfirfarið af framleiðanda þess til að tryggja að það sé laust við innihaldsefni á rauða lista LBC, sem tilgreinir skaðleg efni sem hafa neikvæð áhrif á heilsu manna og umhverfis. Alls var farið yfir rúmlega 8.000 vörur sem settar voru upp í Gradient Canopy í samstarfi við framleiðendur sem deildu viðleitni okkar til að auka gagnsæi í byggingariðnaðinum.

Markmið okkar um notkun heilnæmra efna við byggingu Gradient Canopy teygir sig langt umfram innanrýmin og þá starfsmenn Google sem vinna fyrst og fremst innandyra. Með því að skoða efnin í byggingunni að innan sem utan, þar með talin listaverkin sex umhverfis bygginguna, ásettum við okkur að forgangsraða heilsu samfélaga sem koma við sögu í aðfangakeðjunni sem og lífsferli þeirra byggingarvara sem við notuðum í heild sinni. Í ljósi þess voru efni vandlega metin í samráði við framleiðendur þeirra til að tryggja að heilbrigði væri í forgangi við val á þeim, allt frá áþreifanlegum hlutum á borð við teppi og veggi, til þeirra sem eru síður auðsjáanlegir, svo sem gluggahúðunar og einangrunar byggingarinnar.

En málið snýst ekki eingöngu um þessa tilteknu byggingu og efnin sem notuð voru í hana. Í viðleitni sinni til að stuðla að breytingum í efnaiðnaðinum hvatti Gradient Canopy-teymið framleiðendur til að innleiða Declare-merki í vörulínum sínum, sér í lagi innan þeirra atvinnugreina og vöruflokka þar sem gagnsæi hvað upplýsingar um efni varðar var mjög óalgengt. Þetta eru skýrar og upplýsandi „næringarmerkingar“ fyrir byggingarvörur sem lausar eru við öll innihaldsefni á rauða lista LBC og innihalda efni sem fengin eru með ábyrgum hætti. Margar viðarhurðir og hurðakarmar innan byggingarinnar hlutu til dæmis Declare-merki, sem vörurnar voru ekki með í upphafi verkefnisins.

Ef við ætluðum að ná markmiðum okkar um notkun heilnæmra efna í Gradient Canopy, þurftum við að gera okkur grein fyrir því að við erum hluti af mun stærra alþjóðlegu kerfi iðnaðar og auðlinda. Strangar efniskröfur LBC kröfðust þess að verkefnateymið í heild sinni samræmdi markmið sín og væri opið fyrir því að laga hefðbundna verkferla sína og aðferðir að nýstárlegri lausnum. Með því að tengja hönnuði, framleiðendur, undirverktaka, kaupmenn og byggingaverkamenn gátu allir meðlimir teymisins verið óhræddir við að vera opinskáir um aðferðir sínar og tilbúnir að læra hver af öðrum. Nú þegar þessir teymismeðlimir taka að sér ný verkefni á víð og dreif um landið hafa þeir öfluga verkfærakistu í farteskinu og geta lagt fram þekkingu sína á að meta og hanna byggingar úr heilnæmum efnum.