5 րոպե
"Լավ դիզայնը չի բնութագրվում միայն մեկ առանձնահատկությամբ։ Այն միշտ ամբողջական և համապարփակ մոտեցման արդյունք է, որում հաշվի են առնված մարդկանց կարիքները։ Նման մոտեցումը թույլ է տալիս ստեղծել վայրեր, որտեղ համագործակցությունը հարմար է ինչպես իրական, այնպես էլ վիրտուալ միջավայրում։"
– Ռութ Փորատ, նախագահ և ներդրումների գծով գլխավոր տնօրեն, Alphabet-ի և Google-ի գլխավոր ֆինանսական տնօրեն
Ի՞նչ եք մտածում Մաունթին Վյուի և դրա հարակից տարածքների մասին
Ես մեծացել եմ Պալո Ալտոյում։ Իմ ընտանիքը տեղափոխվել է այստեղ Քեմբրիջից, որը Մասաչուսեթս նահանգում է, իսկ մինչ այդ մենք ապրում էինք Մեծ Բրիտանիայում։ Հայրս որպես ֆիզիկոս էր աշխատում Սթենֆորդի գծային արագացուցչի կենտրոնում (SLAC)։ Մեր այստեղ տեղափոխվելու հիմնական պատճառներից մեկը այստեղի՝ էներգիայով և հետաքրքրասիրությամբ լի մթնոլորտն էր և նոր բաներ, օրինակ՝ Սթենֆորդի ատոմային արագացուցիչը, ստեղծելու ցանկությունը։ Մենք վաղուց ենք տեղափոխվել այստեղ, սակայն զգում եմ, որ նոր բան ստեղծելու ցանկությունը գնալով միայն ուժեղանում է։
Google-ի և Alphabet-ի ֆինանսական տնօրեն Ռութ Փորատը Շոտլանդիայի Գլազգո քաղաքում անցկացված COP26 կոնֆերանսում։
Պատմեք մեզ ավելին այն մասին, թե հատկապես ինչով է ձեզ դուր գալիս այս տարածաշրջանը
Այստեղ մարդիկ ձգտում են առաջընթացի և միշտ քննարկում են նորարարությունները։ Գրեթե յուրաքանչյուր տեղացի կցանկանար փոխել աշխարհը դեպի լավը։ Սա մոտիվացնում է մեզ Google-ում և Alphabet-ում և շատ ուրիշներին, ովքեր ընտրում են ապրել և աշխատել այստեղ։ Սիլիկոնյան հովտում մենք շտապում ենք տեսնել ապագան և քրտնաջան աշխատում ենք այդ նպատակին հասնելու համար։ Այդ իսկ պատճառով այն ինձ համար մոլորակի ամենայուրահատուկ վայրերից մեկն է։
Ինչն է կապում Google-ին Մաունթին Վյուի հետ
Մաունթին Վյուն 1999 թվականից մեր տունն է դարձել, և մենք այստեղից տեղափոխվելու պլաններ չունենք։ Պատահական չէ, որ Google ընկերությունը հենց այս վայրն է ընտրել իր գլխավոր գրասենյակի համար։ Մենք իսկապես շատ ենք սիրում այս քաղաքը։ Մեզ դուր են գալիս ծովածոցի գեղեցկությունը, համալսարաններին մոտիկ լինելը, ընտանիքի համար հարմար միջավայրը և Սիլիկոնյան հովտի սրտում գտնվող քաղաքում աշխատելու հնարավորությունը։
Մեր աշխատակիցներից շատերը ապրում և աշխատում են Մաունթին Վյուում։ Դրա համար մենք՝ որպես ընկերություն, փորձում ենք լավ հարևան լինել։ Տարիների ընթացքում մենք միլիոնավոր դոլարներ ենք ներդրել համայնքում՝ տրամադրելով դրամաշնորհներ Mountain View Education Foundation հիմնադրամին՝ STEM առարկաների հետ կապված կրթական ծրագրերին աջակցելու համար, միջոցներ ենք հատկացրել անվճար ավտոբուսային երթուղու ֆինանսավորման, անօթևաններին և իրենց տները կորցնելու վտանգի տակ գտնվողներին օգնելու համար, ինչպես նաև մասնակցել ենք բնապահպանական նախագծերի, ինչպիսիք են Չարլսթոնի ջրամբարի վերականգնումը։
Մենք հպարտ ենք, որ Google-ի աշխատակիցները՝ որպես կամավոր, ամեն տարի հազարավոր ժամեր են անցկացնում տեղական կազմակերպություններում, ինչպիսիք են սոցիալական ծառայությունները, հեծանիվներով փոխանակման կենտրոնը, դպրոցները և Համակարգիչների պատմության թանգարանը։
Ինչպե՞ս են Gradient Canopy-ն և Bay View-ն շարունակում Google-ի պատմությունը այս տարածաշրջանում
Gradient Canopy-ն մեր առաջին ճարտարապետական նախագիծն է Մաունթին Վյուում։ Մենք երկար ենք մտածել, թե ինչպես լավագույնս իրականացնել այս նախագիծը, որպեսզի այն համապատասխանի Նորթ Բեյշորի ապագայի քաղաքի տեսլականին։ Gradient Canopy-ն վերաիմաստավորում է աշխատավայրի մասին պատկերացումը լավ մտածված դիզայնի միջոցով, որը մարդկանց կապում է համայնքի հետ, ներդաշնակորեն ինտեգրվում է բնական լանդշաֆտին, ավելի մեծ տնտեսական արժեք է ստեղծում քաղաքի համար և աջակցում աշխատողներին, որոնք սիրում են ապրել և աշխատել Մաունթին Վյուում։
Դեռևս համաճարակից առաջ մեր աշխատանքային տարածքներն ապահով էին, կանաչ և ֆունկցիոնալ՝ Google-ի եզակի ոճի ոչ մեծ շտրիխներով։ Լավ ձևավորված աշխատավայրում միշտ հաճելի է գտնվել։ Այդ իսկ պատճառով, լոքաութից հետո աշխատակիցների գրեթե կեսը նախընտրեց վերադառնալ գրասենյակներ։ Այժմ, նոր ճարտարապետական նախագծերի շնորհիվ, մենք կարող ենք մեր բազմաթիվ պարտավորություններն ու փորձը փոխանցել տեղի համայնքին։ Մենք ցանկանում ենք ստեղծել հանրային տարածքներ, որոնք կլինեն ոչ միայն գրավիչ, այլև էկոլոգիապես մաքուր և առողջության համար անվնաս։
Արտապատկերում, որում ցուցադրված է Bay View կոնֆանսների կենտրոնի սպասասրահը և պատուհանից տեսարան դեպի ՆԱՍԱ-ի հողմային թունել։
Պատմեք մեզ ավելին այն մասին, թե ինչ է նշանակում «լավ դիզայնը» Google-ի համար
Լավ դիզայնը չի բնութագրվում միայն մեկ առանձնահատկությամբ։ Այն միշտ ամբողջական և համապարփակ մոտեցման արդյունք է, որում հաշվի են առնված մարդկանց կարիքները։ Այս մոտեցումը համատեղում է շփվելու, սովորելու, համագործակցելու և կենտրոնանալու հնարավորությունները։ Նման մոտեցումը թույլ է տալիս ստեղծել վայրեր, որտեղ համագործակցությունը հարմար է ինչպես իրական, այնպես էլ վիրտուալ միջավայրում։
Ինչպե՞ս են այս գաղափարներն իրականացվել Bay View-ի և Gradient Canopy-ի դիզայնի մեջ
Դիզայնը ստեղծելիս մենք հետևել ենք Google-ի այս կարգախոսին․ «Օգտատերերի շահերն ամենից վեր են»։ Այս նախագիծը հիմնվում է տարիների հետազոտությունների և գիտական այն տվյալների վրա, թե ինչն է օգնում աշխատակիցներին լինել առավել արդյունավետ և ստեղծարար։
Մենք նախ որոշեցինք վերանայել համատեղ և ինքնուրույն աշխատանքի համար նախատեսված տարածքները և փոխել բաց և փակ տարածքների հավասարակշիռը։ Մենք հասկանում էինք, որ բաց տարածություններում դժվար է կենտրոնացած աշխատել։ Դրա համար անհրաժեշտ են հանգիստ և փակ գոտիներ։ Մյուս կողմից, մենք ցանկանում էինք, որ հանդիպումների և համատեղ աշխատանքի համար նախատեսված տարածքները լինեն բաց և հարմարավետ և համապատասխանեն այն խնդիրներին, որոնց վրա թիմն աշխատում է։ Լավ տեխնիկական հագեցվածությունը կարևոր է ընդհանուր տարածքների համար։ Այն հեռակա աշխատողներին թույլ է տալիս բոլորի հետ հավասարապես մասնակցել նախագծերին։ Մենք փակ և բաց տարածքներ ենք տեղակայել իրար մոտ, որպեսզի աշխատակիցները, անհրաժեշտության դեպքում, կարողանան արագ տեղափոխվել մի տարածքից մյուսը։
Երկրորդ հարկի արտապատկերում, որտեղ շատ թիմեր կողք կողքի են աշխատում։
Հաջորդ գաղափարը վերաբերում է բիոֆիլ ինտերիերի դիզայնին և դրա դրական ազդեցությանը մտավոր գործունեության վրա։ Արդեն երկար տարիներ մենք փորձում ենք մեր գրասենյակներ ներմուծել բնության տարրեր՝ առողջ և բնական նյութեր, ինչպես նաև հաճելի գույներ, ձայնամեկուսացում, օդորակման համակարգեր և ցիրկադային լուսավորություն։
Բիոֆիլ դիզայնը և ներսի օդի կառավարումը կարող են ավելորդ թվալ, սակայն մենք կարծում ենք, որ կանաչ և անվտանգ աշխատանքային տարածքը ֆինանսական կայունության հիմքն է։ Այս մոտեցումը ձեռնտու է բոլորին, քանի որ առողջ և երջանիկ աշխատակիցները, որոնք ունեն բոլոր պայմանները արդյունավետ աշխատանքի համար, ավելի լավ արդյունքներ են ցույց տալիս և օգնում են ընկերությանը զարգանալ։
Ինչպե՞ս է այս ամենը կապված Google-ի սոցիալական զարգացման գլոբալ նպատակների հետ
Մեր նպատակը տեղի համայնքի հետ ավելի խորը կապ ստեղծելն է՝ վերստեղծելով այն մթնոլորտը, որում մենք աշխատում և ապրում ենք առաջին հարկի ժամանակակից տարածքներում։ Մենք երկարաժամկետ օգուտ ենք տեսնում այն գործընթացում, որը ենթադրում է միջոցների ներդրում վայրերում, որոնք արտացոլում են Google-ի և տեղի համայնքի արժեքները։
Հոդվածն առաջին անգամ հրապարակվել է 2022 թ․ մայիսին
