Халықаралық болашақ өмір институтының (ILFI) Living Building Challenge (LBC) Materials Petal сертификаты берілген Gradient Canopy ғимаратында улы емес әрі экологияны қалпына келтіретін материалдарды іске жарату әдістері бірінші орында тұрды. Осы себепті ағаштың қалпына келу қасиеттері мен көмірқышқыл газын сіңіру мүмкіндіктерін тиімді пайдалану үшін бірнеше қабатты экологиялық таза ағашты ғимарат ішіне пайдалану жолдарын зерттедік.
Бірнеше қабатты ағаш – бағандар, арқалықтар, едендер және шатырлар жасау үшін нығыздап біріктірілген ағаш пайдаланылатын құрылыс техникасы. Бұл әдіс дәстүрлі құрылыс әдістеріне қарағанда көмірқышқыл газының концентрациясын азайтуға мүмкіндік береді. Ғимаратта бірнеше қабатты ағаш маңызды рөл атқарады. Біздің бұдан түйгеніміз Google-дың басқа да құрылыс жобаларына негіз болды.
Бірнеше қабатты ағаштың маңызы бізге біраз уақыттан бері қызық болып келеді. Себебі ол өзінің биофильді қасиеттері арқылы денсаулыққа қолайлы, өнімділігі жоғары және көз тартымды жұмыс орындарын қалыптастыруға ықпал етеді. Биофилия – адамдарға жайлы орта қалыптастыру үшін табиғатты дизайнмен үйлестіру қағидасы, ал пайдаланылған ағаш элементтерін ғимарат ішінде пайдалану жабын мен бояу сияқты қосымша материалдарға деген мұқтаждықты азайтып қана қоймай, адамдарға ғимарат ішінде де табиғатқа жақын бола түсуге мүмкіндік береді. Gradient Canopy ғимаратын жобалауды бастаған кезде, ғимарат құрылымын толықтай бірнеше қабатты ағаштан жасау мүмкіндігін қарастырдық. Алайда біз қалаған ұзын аралықтарды жүзеге асыру мүмкін болмайтынына көзіміз жетті. Дегенмен ағашты ғимараттың ішкі бөлігіндегі кейбір құрылыс элементтеріне пайдалана алдық.
Gradient Canopy ғимаратында бірнеше қабатты ағаш элементтері кезектестіріліп айқас қабатталған ағаш (CLT) бөліктері түрінде қолданылады. Бұл – құрылымдық беріктікті арттыру үшін тұтас кесілген ағаш сүрегін бірнеше қабат етіп желімдеу арқылы дайындалатын инженерлік ағаш түрі. Алғашында CLT бөліктерін екінші қабаттағы бетон едендердің беріктігін қамтамасыз ету үшін шеген (бетон құятын қалыптар) ретінде пайдаландық. Әдетте оларды бетон қатқаннан кейін алып тастайды. Бірақ біз CLT бөліктерін бірінші қабаттағы кеңістіктің ағаш төбесі және ішкі аулалардың қоршаулары ретінде қолданылатындай етіп орнында қалдырдық. Сондай-ақ ағаш ғимараттағы, әсіресе жиналыс бөлмелері мен конференция бөлмелерінің есіктері мен есік жақтаулары ретінде қолданылды. Осы мақсаттарда ұжым жеткізушілермен бірге жұмыс істеп, толық есік жинағына Declare жапсырмасы сертификатын алу мүмкіндігіне ие болды. Бұл бізге химиялық құрамы қауіпсіз құрылыс материалдарына басымдық беріп, денсаулыққа зияны жоқ ішкі кеңістік ортасын жасауды басты орынға қоюға көмектесті.
