5 минут
"Тамаша дизайн бір ғана нәрседен тұрмайды. Ол кешенді, жан-жақты қамтылған әрі пайдалануға ыңғайлы болуы керек. Мұндай дизайн адамдарға жайлы ортада бетпе-бет немесе виртуалды түрде бірлесіп жұмыс істеуге мүмкіндік береді."
– Президент әрі инвестиция бөлімінің басқарушысы, Alphabet және Google компанияларының бас қаржы директоры Рут Порат.
Маунтин-Вью және оның айналасымен жеке қарым-қатынасыңыз қандай?
Мен бала кезімде Ұлыбританиядан Массачусетс штатындағы Кембриджге көшіп келдім, Пало-Альтода өстім. Әкем Стэнфордтың Сызықтық үдеткіш орталығында физик болған. Оның отбасымызды осында көшіруінің басты себептері – талпыныс, интеллектуалдық қызығушылық және бұрын-соңды жасалмаған нәрселерді жасауға ұмтылу. Мысалы, ол Стэнфордтың атом бөлшектерін үдеткіш құрылғысын құрастыруды армандады. Мұндай талпыныс әкем бізді көшіріп әкелген кезден бастап күрт өсті.
Google және Alphabet компанияларының бас қаржы директоры Рут Порат Шотландияның Глазго қаласындағы COP26 конференциясында.
Бұл аймақтың ерекшелігі неде екенін айтып бере аласыз ба?
Мұндағы инновация мәдениеті керемет және ол күн тәртібінен түспейді. Барлығының дерлік әлемге өзгеріс енгізуге деген құлшынысы бар – бұл бізге Google және Alphabet компанияларында мотивация береді және осында тұрып, жұмыс істеуді таңдаған басқа адамдарды да ынталандырады деп ойлаймын. Алқапта біз көреміз деп үміттенетін болашақты қалау талпынысы бар және бұл оны планетадағы ең ерекше орындардың біріне айналдырады деп ойлаймын.
Google-дың Маунтин-Вьюмен байланысы қандай?
1999 жылдан бері Google компаниясы Маунтин-Вьюді өз үйіндей көріп келеді және біз әлі талай жыл бойы осында қаламыз деп ойлаймыз. Google компаниясы өзінің штаб-пәтерінің орналасу орны ретінде Маунтин-Вьюді таңдады, бізге бұл жерде барлығы ұнайды. Соның ішінде шығанақтың сұлулығы, университеттердің жақын орналасуы, отбасы үшін қолайлы орта және Силикон алқабының қақ ортасында орналасқан қалада жұмыс істеу мүмкіндігі ұнайды.
Біздің көптеген қызметкеріміз Маунтин-Вьюде тұрып, жұмыс істейді, осы орайда компания ретінде біз жақсы көрші болу қажеттігін толық түсінеміз. Осы жылдар ішінде біз қауымдастыққа миллиондаған доллар инвестицияладық, соның ішінде Маунтин-Вью білім беру қорына STEM білім жобасын қолдау үшін гранттар бердік, Маунтин-Вью қауымдастық шатлын қаржыландырдық, баспанасыздықпен күресу және оның алдын алу қызметтерін қолдау үшін грант арқылы қаржыландыру жобасын, Чарльстон суқоймасы сияқты қалпына келтіру экологиялық жобаларын жүзеге асырдық.
Және Google қызметкерлері жыл сайын Маунтин-Вьюдегі ұйымдармен, соның ішінде Маунтин-Вью Қауымдастық қызметтері агенттігімен, Силикон алқабының велосипед компаниясымен, Маунтин-Вью мектептерімен және керемет Компьютер тарихы мұражайымен мыңдаған сағат бойы ерікті ретінде жұмыс істейтінін мақтан тұтамыз.
Gradient Canopy мен Bay View кампустары Google-дың осы аймақпен бұрыннан келе жатқан қарым-қатынасын қалай жалғастырады?
Gradient Canopy – бұл біздің Маунтин-Вьюде іргетасынан бастап қалаған алғашқы ғимаратымыз, сондықтан Норт Бэйшордың болашағына қатысты қаланың өзіндік көзқарасына сай келетін жобаны қалай жақсырақ жүзеге асыруға болатыны туралы ұзақ әрі тыңғылықты ойладық. Gradient Canopy кампусы қауымдастыққа бағытталған, табиғи ортамен үйлесетін, қалаға тамаша экономикалық серпіліс беретін арнайы дизайнымен жұмыс орнының маңыздылығына жан-жақты көңіл бөледі, сондай-ақ Маунтин-Вьюде тұрып, жұмыс істеуді ұнататын қызметкерлерімізді қолдайды.
Пандемияға дейін де Google жұмыс кеңістіктері қауіпсіз, тұрақты және функционалдық жағынан ыңғайлы болды. Олардың Google-ға тән айрықша стилін де айта кету керек. Керемет дизайн адамдар қалайтын орынды жасауға мүмкіндік береді, сондықтан қауіпсіз уақыт орнап, кеңселеріміз қайта ашылған соң, әлемнің түкпір-түкпіріндегі қызметкерлеріміздің жартысына жуығы жұмысқа өз еркімен келді. Бүгінде басынан бастап жүзеге асырылып жатқан жобаларымыз арқылы біз жергілікті қауымдастыққа өз тәжірибемізді ұсына аламыз. Біз іс жүзінде бұл кеңістіктердің қауымдастықты өзіне тартуына, оның төзімділігі мен салауатын жақсартуға көмектесуіне назар аударамыз.
Bay View көрме кешенінің дәлізінен ашылатын, артқы жағында NASA-ның аэродинамикалық құбыры көрінетін ландшафт бейнеленген рендеринг.
Google компаниясы "тамаша дизайн" сөзіне қандай анықтама беретіні туралы айта аласыз ба?
Тамаша дизайн бір ғана нәрседен тұрмайды. Ол – әр пайдаланушының ыңғайы ескерілетін кешенді, жан-жақты жұмыстың нәтижесі. Онда әлеуметтену, білім алу, бірлесіп жұмыс істеу, зейін қою мүмкіндіктері назарға алынады. Мұндай дизайн адамдарға жайлы ортада бетпе-бет немесе виртуалды түрде бірлесіп жұмыс істеуге мүмкіндік береді.
Бұл Bay View мен Gradient Canopy кампустарының дизайнын сипаттайтын нақты идеяларға қалай әсер етеді?
Google негізін қалаушылардың "Пайдаланушыға зейін қойыңыз, қалғаны өздігінен болады" деген ұраны кеңселеріміздің дизайнына басынан бастап тірек болды. Бұл жоба үшін қызметкерлерге барынша өнімді әрі шығармашыл болуға көмектесетін көп жылдық зерттеу деректері мен ғылыми деректер пайдаланылды.
Біз қарастырған бірінші идея кеңсенің "ішін сыртына төңкеру", нақтырақ айтқанда, жеке және бірлесіп жұмыс істеу кеңістіктері арасындағы байланысты, ашық және жабық кеңістіктегі қатынасты өзгерту болды. Солай зейін қойып істейтін жұмыс үшін қиындықтар тудыратын ашық жұмыс кеңістіктерінен жабық бұрыштарға ауыса бастадық. Ал бірлескен жұмыстың кезегі келгенде, тар кездесу бөлмелерінен кең әрі барынша қолайлы жұмыс кеңістіктеріне көшкенді жөн көрдік. Қашықтан жұмыс істейтін әріптестердің іске тең дәрежеде қатысуын қамтамасыз ету үшін мұндай бірлесіп жұмыс істеу кеңістіктерінде технологияның маңызы зор екені анық. Оңашада отырып еңбектену бұрыштарының топпен қарқынды түрде бірлесіп жұмыс істеу кеңістіктеріне іргелес орналасуы адамдардың қажет болған жағдайда жылдам ауысуына ыңғайлы.
Екінші қабат пен ондағы командалардың жұмыс орындары бейнеленген рендеринг.
Келесі идея биофилияның когнитивтік артықшылықтарына қатысты. Біз көп жыл бойы кеңселерімізге биофилиялық дизайнды енгізу жұмыстарын жүргізіп келеміз, осылайша оларға зиянсыз материалдар, табиғи материалдар, өрнектер, дыбысты кеңістік, жылу жайлылығы, реттелмелі ауа ағыны және циркадтық жарықтандыру сияқты негізгі табиғи аспектілерді қолданып жүрміз.
Кейбіреулер мұндай биофилиялық немесе ауа сапасына қатысты шараларды артық дүние, тіпті ысырапшылдық деп қарастыруы мүмкін, бірақ жұмыс орнына барынша табиғи әрі таза ауаны енгізудің қаржылық себептері де бар. Мұның барлығы адамдардың өмірін жақсартуға бағытталған. Қызметкерлер сау, бақытты болып, қолынан келетін ең жақсы жұмысын жасай алса, бұл барлығына, соның ішінде компанияға да пайдалы.
Мұның барлығы Google-дың қауымдастыққа бағытталған бастамаларына қатысты өр мақсаттарымен қалай байланысады?
Біздің мақсатымыз – біз жұмыс істейтін және тұратын ортаның рухын көрсететін бірінші қабат кеңістіктерін құру арқылы жергілікті қауымдастықпен байланыс орнату және оларға етене жақын болу. Біз өзіміздің және қауымдастықтың құндылықтарын танытатын орындарға инвестиция жұмсаудың ұзақ мерзімді маңызын көреміз.
Алғаш рет 2022 жылдың мамырында жарияланды
